Dios no ta tira pasado di hende den nan cara

Ta solamente hende amarga, sin consenshi ta coba den pasado di otro, p’asina uza esey como arma pa rebaha e otro persona cu ta luchando p’e bay dilanti den su bida. Un hende cu no kier pordona ta practicamente ciego pasobra e ta mira un banda so. (Mateo 6:15).

Tur hende por haci fout no ta importa ken e ta, pero tambe tur hende tin e mesun derecho di lanta bek riba pia.

1 Juan 1:9 ta para skirbi: “Si nos confesa nos picanan E ta fiel y husto di pordona nos, nos picanan y pa limpia nos di tur inhusticia.”

Ningun hende no tin derecho pa uza pasado di otro como trampolin di bentaha den ningun sentido, pasobra den esey no tin ganashi, solamente ta demostra bobedad.

Si bo yiu haci un fout y bo a pordon’e y boso dos ta compronde otro bon, ta imposibel ora algo pasa cu bo ta bolbe lanta e cos bek of tambe entre esposa y esposo. Tur locual a pordona ta keda pordona y no mester lanta fo’i soño mas.

Asina bo ta capaz di lanta algo di pasado, esey ta duna un impresion cu bo no a pordona.

E actitud aki tin hopi famia dividi, hopi divorcio y hopi mucha cu no ta sinti nan mes comodo na cas y ta prefera di ta riba caya, cu scucha cada rato mes un pasado ta treci dilanti, sea di nan mes of di nan mayornan un cu otro.

Si cada biaha un mucha mester scucha cu su mama ta un hende muhe di caya y cu su mama a bandon’e, e ta traumatisa e mucha su bida, pasobra e fout no ta sinta cerca e mucha pero cerca su mayornan cu no kier pordona otro.

Pasobra lo Mi tin misericordia di nan inhusticia y lo Mi no corda nan picanan mas. (Hebreonan 8:12)

Ora e yiu perdi a bolbe bek cas bek, e tata no a tira nada na su cara, pero e tabata contento cu e yiu a bin cas, pasobra e yiu tabata morto spiritualmente y awo el a biba. El a bolbe cas bek. (Lucas 15:11-32)

Ora e hende muhe cu a comete adulterio a keda su so cu Hesus. Hesus a puntr’e: ken a condena bo, el a bisa ni un Señor y Hesus a bise ami tampoco ta condena bo. Bay y di awo pa dilanti no peca mas. (Juan 8:1-11)

Cada biaha cu nos arpenti di nos picanan nos ta blokia boca di satanas y tur esunnan cu e tin den su servicio. 

Laga tur amargura, furia, rabia y calumnia ta kita for di boso, hunto cu tur malicia. Y sea cariñoso cu otro, misericordioso, pordonando otro, mescos cu Dios den Cristo tambe a podona boso. (Efesionan 4:31-32).

Pasobra El a libra nos di e poder di scuridad y a traslada nos p’e reino di Su Yiu stima. Den kende nos tin redencion y pordon di picanan. (Colosensenan1-:13-14).

Mescos leu cu pariba ta fo’i pabao asina el a aleha nos trangrecionnnan fo’i nos. (Salmo 103:12).

Tin hopi hende mara den inmoralidad/idolatria cu tin miedo di sali afo pa nan amigo of amiga. No bay cana papia riba nan. Nan ta sclavisa den scuridad, sin speransa di salida pasobra nan ta wak riba hende y no riba Dios.

Tur hende mester compronde cu asina bo arepenti di bo pica, no ta importa su grandura, Dios ta pordona y ta yuda bo lanta bek riba pia.

No laga ningun hende gaña boso, y asina permanece den scuridad,

Tin pordon den Cristo Hesus.