DIMP: Cumplimento pa cu entregamento di  declaracion di impuesto mester mehora 

Departamento di Impuesto ta un departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal. Responsabilidad fiscal ta encera  entregamento di declaracion y haci e pago corespondiente na tempo.  

E cumplimento (of “compliance”) cu entrega di declaracion di impuesto ta un parti importante pa loke ta trata e  comportacion fiscal di un contribuyente. Durante e ultimo añanan e cumplimento ta fluctua y a keda den su  mayoria bou di 80%. Departamento di Impuesto ta subraya cu e cumplimento pa cu entregamento di declaracion di  inkomstenbelasting y winstbelasting mester mehora. Por ripara cu e cumplimento riba tereno di winstbelasting a  cuminsa disminui gradualmente y ta un desaroyo preocupante pa Departamento di Impuesto. Cumplimento pa cu  entregamento di declaracion mensual ta bayendo den bon direccion y por mehora aun mas. 

Aki ta sigui un bista di e “compliance” pa loke ta declaracionnan di impuesto cu a wordo entrega y e esfuerso pa  mehoracion riba e tereno aki. 

Compliance pa cu declaracion di impuestonan mensual
	2016	2017	2018	2019	2020	2021	2022*
Loonbelasting	70%	74%	67%	75%	71%	75%	78%
BBO	66%	68%	63%	69%	66%	69%	69%
Toeristenheffing	67%	64%	61%	70%	79%	85%	86%
Bijzonder belasting verblijf	69%	67%	66%	73%	79%	85%	86%
Speelvergunningsrecht	100%	100%	100%	100%	89%	91%	87%
* te cu juli 2022

Compliance pa cu declaracion di inkomstenbelasting y winstbelasting
	2015	2016	2017	2018	2019	2020	2021
Inkomstenbelasting	79%	74%	74%	72%	72%	67%	–
Winstbelasting	67%	68%	65%	62%	57%	56%	60%

Sin declaracion ta paga mas 

Keda sin haci declaracion ta nifica cu Inspector di impuesto lo impone un cobransa taxativo basa riba un  calculacion. Alabes e cobransa lo inclui un boet pa incumplimento. Esaki ta nifica cu e contribuyente tin cu paga  mas hopi na impuesto locual por causa cu e ta cay den un situacion financiero dificil y inespera. 

Trahando pa mehora “compliance” 

Departamento di Impuesto ta trahando constantemente pa mehora e compliance pa esaki por yega rond di 80% of  90%. E departamento no solamente ta keda informa e contribuyentenan di nan derecho- y debernan fiscal pero ta  actua tambe na momento cu e contribuyente no ta haci caso di e notificacionnan menciona.  

Conscientisacion pa cu cumplimento cu debernan di impuesto ta forma un parti esencial di e plan di comunicacion  di Departamento di Impuesto pero tambe ta e responsabilidad di empresanan di contabilidad, abogadonan fiscal y  tambe representantenan di comercio caminda cu ta enfatisa cu cada contribuyente mester ta consciente di e responsabilidad serio aki. Keda sin entrega un declaracion di impuesto y haci e pago concerni no ta un opcion  mirando cu esaki ta castigabel pa ley.  

Departamento di Impuesto kier duna mas transparencia den e trabaonan riba tereno di compliance, kier hala  atencion di esnan cu no ta cumpliendo debidamente y ta gradici den e mesun rosea e contribuyentenan cu si a  cumpli debidamente cu nan deber di entrega nan declaracionnan di impuesto. E grupo aki a demostra e  consciencia y importancia di asumi nan responsabilidad.  

Pasobra na final “Cumpli cu impuesto ta cumpli cu bo pais.”