DIMP: Areglo pa comerciante chikito ta algo hopi importante

Areglo pa comerciante chikito ta algo hopi importante tambe, cual ta conoci como Kleineondernemersregeling (KOR). KOR ta un beneficio fiscal cu ta brinda na tur comerciante chikito cu tin un empresa propio.

Meverly Romano, vocero di DIMP, a bisa cu e comerciante chikito mester ta un eenmanszaak y nan volumen di benta (omzet) pa aña no ta pasa 84 mil florin. Unabes cu tin un eenmanszaak y e entrada no ta mas cu 84 mil florin, en principio por bin na remarca pa KOR. Mas cu claro Departamento di Impuesto (DIMP) tin mas condicion. E condicion ta cu e comerciante mester biba na Aruba, e mester tin empresa propio, e volumen di benta ta 84 mil of menos. Y si acaso e ta explota un propiedad inmobil cu no ta uzo pa residencial, e ora ey e no ta bin na remarca pa KOR. En caso cu e ta huur un oficina y no ta uzo residencial, e no ta haya KOR.

CUMPLI CU REKISITO DI KOR

Tin condicion cu ta mara na KOR. Romano a sigui splica tur comerciante cu ta cumpli cu e rekisitonan por bin na remarca pa KOR. E beneficio di KOR ta cu no mester paga BBO tur luna. E vocero a indica cu e comerciante ta haci aangifte di BBO un bes pa aña solamente. Mescos cu tur comerciante ta haci aangifte di BBO tur luna, e personanan cu tin status di KOR ta haci esey un bes pa aña.

REGISTRA OMZET

Loke si ta su deber administrativo ta registra e omzetnan durante henter aña. Esey ta bin pa motibo cu e ta un rekisito den ley pa tur esunnan cu tin un empresa. Na final di aña e mester entrega un declaracion anual di cual DIMP ta habri disponibel via e portal Bo Impuesto. DIMP ta habri esey na december y e fecha limite di entrega ta dia 15 di januari. Esey ta significa cu un bes pa aña e comerciante chikito mester haci su declaracion.

Esey ta un parti importante, pasobra e comerciante chikito nobo cu a caba di lanta, nan tin mas gasto. Nan ta haya e facilidad aki y e ora ey nan no mester paga BBO. Ley ta indica pa haya KOR, e comerciante mester entrega un peticion p’e aña siguiente no mas laat cu prome di october. E aña aki prome di october a cay den fin di siman, p’esey e deadline a bira 3 di october. P’e comerciantenan chikito cu ta desea di haya KOR pa 2023, tin te dia 3 di october pa entrega nan peticion na DIMP.