Diesocho pashent di Respaldo desampara

Famia di varios pashent cu ta keda na Respaldo, ta den un incertidumbre, mirando tur e recortenan cu ta tumando luga. Keto bay aparentemente no tin solucion.

Sharleen Hengeveld ta un famia preocupa di un di e pashentnan kedando n’e institucion. El a splica cu na juli a haya informacion cu a tin algun problema andando cu Respaldo den e parti financiero.

Aparentemente tabatin mal maneho di finansa na Respaldo cu a pone cu gobierno a dicidi pone un stop na nan presupuesto y tanten cu nan no por comproba unda e gastonan ta y pakico ta pidi placa, gobierno no lo facilita e placa aki, segun Hengeveld.

Hengeveld ta sigui bisa cu nada no ta concreto. No tin ningun proyecto andando. E fecha di dia prome di november ta yega y unda “nos hendenan lo bay biba tanten cu no tin solucion.”

Ta bisa cu e famianan tin cu tuma nan na cas. “Pero nos no ta capacita pa por handle cu nan. Gina Maduro tabatin un entrevista mainta y por mira con e ta bisa cu ta bezig ta trahando riba un solucion temporal y esaki ya ta bayendo basta bon cu e clientenan ta uitbehandeld.”

CIERTO PLAN

Den pasado e director di Respaldo a yega di menciona cu e tin cierto plan unda cu e kier hiba e clientenan algun caminda. A papia di hiba nan na un luga unda cu por haya un centro di cuido. Hasta el a pensa cu tin plan p’asina arma of construi of haci uzo di un facilidad cu t’ey caba na Pos Chikito. Pero tur e plannan aki tur a cay na awa.

Te aworaki Hengeveld a splica cu e no sa cu tin un punta poni riba e plan ey. “E ta bunita riba papel y den palabra.”

STICHTING HUNTO

Tin di compronde di Minister Rocco Tjon, el a institui un otro fundacion, cu no ta trata solamente cuido di salud mental, pero ‘verslavingszorg’ cu yama Stichting Hunto, unda cu hasta nan ta construyendo un edificio, cu lo ta costando basta placa. Hengeveld a indica cu ta prome biaha e ta scucha di e institucion aki. E unico opcion cu a duna Hengeveld, ta si su mama bay un di e casnan di hende grandi. 

NO TA HAYA OIDO

Tin comunicacion habri cu e minister, pero no a sigui move riba ceramento di Respaldo dia prome di november. A manda un carta un carta como protesta, riba e ultimo carta cu e famianan a haya di dr. Van Gaalen unda cu ta bisa cu lo cera dia prome di november. “Pero di kico e protesta aki ta yuda nos. Ta den gobierno su man. Si Respaldo ta cera, ta gobierno t’e unico cu por haci cu e no ta cera. Si ta bisa cu ta busca un solucion temporal responsabel, kico t’e solucion responsabel p’e personanan aki. Nan mester di un tratamento special. Unda nan ta bay hay’e cu no ta aki.” Segun Hengeveld ta pensa pa laga e luga habri te ora cu tin un otro opcion. Esey t’e unico cos cu e ta mira cu ta responsabel.