Diesocho aspirante pa Wardacosta a completa nan prome luna di introduccion

Diabierna ultimo, e cadettenan di e cuerpo nobo di Wardacosta di formacion basico (BOK) 2022 despues di cuater siman intenso di introduccion, a drenta den e Base Naval Parera. E diesocho aspirantenan di Aruba, Corsou y Sint Maarten, tur tin un obhetivo: un bunita carera den Wardacosta.

Durante e simannan di introduccion, e hobennan a sigui les y a experimenta varios campamento bou direccion di nan instructornan. Durante di e campamentonan, e cadettenan a marcha varios kilometer, a landa hopi, a cushina nan mesun cuminda, a traha raft y a realisa ehercicio anfibio. Nan ehercicio final p’e simannan di introduccion a cuminsa diahuebs anochi ultimo. P’e ehercicio final, e cadettenan a marcha y a rema den lama cu destino Base Naval Parera diabierna mainta. Den Base Naval Parera, a ricibi e aspirantenan cu un fuerte aplauso p’e miembronan di Wardacosta y e otro coleganan.

Durante e ceremonia di entrada, director di Wardacosta, Frank Boots, a indica den un discurso n’e aspirantenan y nan instructor. “Boso 18 a crusa e liña di meta, cuater siman di traha hunto como un solo ekipo pa boso t’aki hunto cu boso instructor. Mi ta convenci cu tur a siña hopi di e otronan. Awe boso a yega e meta. Hunto henter anochi, e dolor, e falta di drumimento y e cansancio cu tur a experimenta. Esaki t’e comienso di e formacion y hunto boso a supera e prome fase dificil y boso t’ey aki como e diesochonan. Sigui traha hunto durante resto di e aña, motivando otro y yuda otro mutuamente durante di e entrenamento. Mi ta desea boso lo miho p’e resto di e formacion basico di Wardacosta.” Despues di e discurso di e director, e cadettenan a ricibi nan baret oficial di BOK como muestra di gradicimento pa nan actuacion durante e simannan di introduccion.

E siman aki, e cadettenan lo cuminsa cu e module di habilidad basico cu ta inclui prome auxilio y habilidadnan di tiro cu lo dura pa 8 siman. Wardacosta ta desea e aspirantenan hopi exito.