Diescinco aña manehando Banco di Seguro Social

Awe mainta na e sucursal di Sociale Verzekeringsbank (SVb) na Vondellaan empleadonan a topa pa conmemora cu mañan diasabra ta cumpli 15 aña cu ir. Edwin Jacobs a cuminsa sirbi comunidad di Aruba mediante SVb.

“Inmensamente agradeci na e famia di SVb cu a acepta mi y a coopera cu mi durante e 15 añanan aki. Agradecido tambe na tur e politiconan cu mi a traha cu nan durante e 15 añanan aki. Cu fe y conviccion pa sigui sirbi Aruba, hunto cu nos famia di SVb den e miho forma”, asina Edwin Jacobs a skirbi riba su pagina di Facebook.

Jacobs a cuminsa su carera den gobierno na Oficina Central di Estadistica (CBS), despues na VROM y a subi lista di partido MEP pa eleccion di aña 2001. El a bira parlamentario y hasta lider di fraccion di MEP den parlamento pero a opta pa bandona politica na 2007. For di ey el a asumi e funcion di director di SVb. Ta bon pa agrega cu desde aña 2020 e ta director di AZV tambe. Y mientras Jacobs a reorganisa SVb den un organisacion moderno, el a sa di controla e gastonan den AZV di tal forma cu e aña aki caba, probablemente, lo no tin deficit financiero mes. Jacobs, banda di su funcion na SVb, a corta gasto den AZV pa garantisa futuro di e seguro medico general di nos pais.