Dies punto di recomendacion pa un vacation rental mas responsabel y sostenibel

Vacation Rental Professionals Aruba (VRPA) a expresa nan sosten pa mas cumplimento y regulacion den e industria di ‘vacation rentals’ pa asina sigura un crecemento continuo riba e isla. Como cu vacation rental ta forma un parti significante di e industria turistico y ta un tendencia di biahe global cu ta creciendo rapidamente, VRPA ta kere cu mas regulacion ta necesario pa por maneha e industria na un manera responsabel y sostenibel.

E meta di e guia pa ‘vacation rentals’ mas responsabel y sostenibel na Aruba ta pa traha huntu cu conseheronan pa wak con por implementa y ehecuta e recomendacionnan.

Un estudio haci recientemente riba e impacto economico di vacation rental na Aruba a constata cu e industria ta contribui cu casi 1 biyon florin na e economia local.

VRPA, representa pa e miembronan Sjoerd de Vries, Alex Cybul y Alberto Perret, den colaboracion cu Dennis Goedheid, kende ta revolucionando e manera di inverti y maneha vacation rentals pa casi un decada caba na Orlando, Florida, a desaroya un lista di dies recomendacion pa vacation rental mas responsabel y sostenibel na Aruba. E recomendacionnan ta inclui introduccion di un sistema di licencia pa vacation rentals, aumenta cumplimento di belasting, enrikece y empodera e forsa laboral Arubano, sigura un balans adecua entre vacation rentals y vivienda pagabel y implementacion di un plan di maneho pa zonido, stacionamento y desperdicio.

Pa sigura oportunidadnan igual entre vacation rental y hotelnan tradicional, VRPA ta sugeri pa cera e acuerdonan cu OTA’s (manera Airbnb) pa remiti e Tourist Levy y e Environmental Levy directamente di parti di e propietarionan, y pa esunnan cu ta maneha vacation rental remiti belasting di parti di e propietarionan pero basa riba nan ganashi.

E sistema di licencia pa vacation rental cu ta wordo recomenda lo sigura cu un cierto porcentahe di e licencianan duna lo ta pa localnan/residentenan di Aruba. VRPA ta hay’e importante pa sigura un cantidad considerabel di licencia pa e comunidad local. Parti di e costo pa un licencia di vacation rental por wordo uza pa sostene proyectonan cu lo enfoca riba vivienda pagabel.

Pa conserva e esfera di e bario, e vacation homes semper lo wordo bon manteni, nan lo ta limpi y sigur y e propietarionan ta dispuesto pa inverti den nan propiedadnan. Un plan di maneho pa zonido, stacionamento y desperdicio tambe mester wordo implementa pa asina sigura e comodidad y siguridad di e huesped y e residentenan permanente.

Finalmente, VRPA ta sugeri pa atrae mas famia, Millennials, y Gen Z, kende ta prefera vacation rentals y lo representa 75% di tur consumidor y biahero pa aña 2025, y cu expectativa di un cresemento anual di 9.87% pa e industria di vacation rental entre 2021-2025. VRPA ta kere cu manteniendo e ganashinan den e comunidad local Arubano, e placa lo keda Aruba y lo beneficia e economia di e isla.

E lista completo di recomendacionnan:

·         Introduccion di un sistema di licencia pa vacation rental

·         Aumenta cumplimento di belasting

·          Enrikece y empodera e forsa laboral Arubano

·         Sigura un balans adecua entre vacation rentals y vivienda pagabel

·         Introduccion di un Plan di Maneho di Zonido

·         Introduccion di un Plan di Maneho di Stacionamento

·         Introduccion di un Plan di Maneho di Desperdicio

·         Conserva e esfera di bario

·         Atrae mas famianan, Millennials & GenZ

·         Mantene ganashinan den e comunidad local Arubano

TOCANTE VRPA
Vacation Rental Professionals Aruba (VRPA) a keda estableci como un asociacion na aña 2021, pa un grupo di propietarionan profesional di vacation rental, pa defende y representa e miho interes di e propietarionan di vacation rental na Aruba, na un manera profesional y diligente.

Den e ultimo añanan, e industria di vacation rentals na Aruba a crece grandemente y a bira un pilar importante den e industria di hospedahe na Aruba. A bira un necesidad pa tin un plataforma profesional pa defende y representa e propietarionan profesional di vacation rental y yuda forma e futuro di e industria di vacation rental na Aruba. Nos vision ta pa bira e bos colectivo y defende e industria di vacation rental na Aruba, pa asina eleva e profesionalismo di e industria y pa Aruba bira e prome opcion den Caribe pa biaheronan dor di sigura un experencia superior pa huespednan y propietarionan satisfecho.

Nos mision ta pa empodera mehoracion di e industria y establece un standard dor di brinda educacion riba e miho practicanan, brinda oportunidadnan pa combersacion entre miembronan, propietarionan, huesped, gobierno, parternan strategico y otro stakeholdernan y pa promove oportunidadnan igual cu regulacionnan solido pa asina Aruba yega su potencial maximo como un destinacion di vacation rental cu lo beneficia e comunidad.