Dialuna awo por solicita pa traha na Wardacosta durante opendag na Marienierskazerne

Bishita Marinierskazerne riba dia 1 di mei a bira un tradicion. Pa tres aña largo a cancela e opendag pa motibo d Covid, sinembargo e aña aki si nan ta cla pa ricibi un y tur. Shalick Clement, vocero di Wardacosta di Caribe Hulandes, a comenta cu dialuna awo, cu ta un dia liber, ta spera tur hende pa e opendag na Marinierskazerne fo’i 10:00 am te cu 4:00 pm. 

E evento lo ta yena cu hopi actividad atractivo p’e muchanan. Lo tin playground, truck di cuminda, demostracion y show di e unidadnan di Kustwacht y Marina. Tambe lo tin presentacion di AruMil.

Di parti di Kustwacht por spera cu tur su unidadnan lo ta presente pa e publico por cera conoci mas di cerca cu tur nan trabounan. E helicopter tambe lo t’ey pa publico por bay cerca of te hasta bay den dje y saca potret. E cutter Panther y botonan MetalShark tambe lo t’ey e dia aki pa por mira nan di cerca. Bishitantenan por hasta subi Panther y haya un recorido.  E trahadonan di Wardacosta lo duna un splicacion tocante nan trabou y haci un demostracion.  

Kustwacht lo tin un tent di informacion caminda tur hoben cu ainda no a solicita pa traha eynan, pero tin interes, por haci esaki dialuna awo. E interes pa traha na Kustwacht ta sigui crece. Tur hoben entre 18 pa 25 aña di edad por aplica. Mester presenta cu diploma, ID valido y papel di cinco florin di Censo. 

E hobennan cu ta bin na remarca mester tin diploma di EPB, MAVO of EPI di nivel 2. Tambe mester tin paspoort Hulandes, strafblad mester ta limpi y ta consehabel cu por landa mirando cu e trabou ta riba lama. Si ta bisti bril por pasa toch como cu den e test medico lo sali afo si ta bin na remarca pa eherce e trabou. Hende muhe tambe por aplica. 

Por ultimo Shalick Clement ta invita pueblo di Aruba pa dialuna awo pasa na Marinierskazerne Savaneta. Lo ta un dia yena cu hopi demostracion y informacion.