Diadomingo lo tin Santo Sacrificio di misa na Kapel di Alto Vista

Pa e personanan di Savaneta y San Nicolas n’e mesun ora lo tin un santo sacrificio di misa den Kapel di Cas Curason di Maria na San Nicolaas. (Blue Army Center). Prome cu Santo Misa ta resa Santo Rosario pa 6:15am, un “Misterio Gososo”, despues ta sigui cu  Salve Regina.  

Pueblo di Aruba, tur devoto y tur fiel ta keda cordialmente invita pa asisti n’e Santa Rosario prome cu Santo Misa. Cu Mama Maria entercede pa nos na nos Tata Celestial. Tur fielnan di Mama Maria ta bin resa e Santo Rosario pa bienestar di henter comunidad di Aruba.

Papa Franscisco ta haci un suplica na mundo pa resa e Santo Rosario, nos ta den un tempo di crisis grandi. E noticianan for di Ucraina ta di lamenta, espantoso pa  mundo henter. Hesus tene piedad pa henter mundo. 

Ban tene un curashi diasabra mainta trempan pa ofrece nos ora, nos oracion y asisti na Santo Misa y resa pa tur esunnan cu ta leu di nan Creador. Laga nos resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan cu ta hiba e bon noticia pa e pueblo di Dios. 

Pa nos Gobernantenan y tur cu ta carga responsabilidad pa nos pais Aruba. Pa tur nos enfermonan den exterior cu a bay busca nan salud, cu pronto nan regresa na Aruba, ful recupera y pa nan gosa di un bon salud.