Dia 4 di òktober ta Dia Internashonal di Animal

Willemstad – Dia 4 di òktober ta dia di nos animalnan, un dia di fiesta ku a kuminsá pa konmemorá e Santu Fransisco di Assisi, Santu di tur animal, kual a biba dediká na hende pober, naturalesa i animalnan. For di e aña 1930, mundialmente ta selebrando 4 di òktober komo dia ofishal di animal.

Riba e dia aki nos ta mal kriá nos bestianan di kas un tiki mas ku nòrmal. Pero dikon nos ta selebrá dia di animal? Pa nos para ketu na bienestar di animal i lokual esaki ta enserá. Hende a kuminsá realisá ku animalnan tambe ta sinti no solamente dolor, pero tambe emoshonnan manera tristesa. Nos a kuminsá mir’é mas for dje punto di bista di e bestia.

Kiko un animal mester den bida pa e sinti su mes bon? Esaki ta konta, no solamente pa animalnan ku ta sufri manera kachonan desampará, pero tur animal ku nos ta topa diariamente. Kada bestia tin derecho riba un bida agradabel. Nos bestianan di kas, animal salbahe i tambe animalnan di krío. E kondishon den kua nan ta biba mester ta apropía, e nutrishon mester ta adekuá i e bestia mester por sosialisá ku su propio espesie. Esakinan tur ta aportá na bienestar di e animal.

Ta un hecho ku animalnan doméstiko ta kontribuí na nos bienestar. Tambe ta probá ku animalnan salbahe ta kontribuí na nos medio ambiente, kual na su turno tambe ta aportá na nos bienestar. Pues kuidando bienestar di animal en general nos ta kuida nos propio bienestar.
Ku nos perkurá pa apliká e tópikonan menshoná aki riba dia di animal, nos animalnan sigur lo por disfrutá di un dia di animal fantástiko!
Esnan ku ta interesá por wak un video klip ku Ministerio di GMN a traha spesialmente pa e dia di awe dor di bai riba e link aki: https://youtu.be/3yHEn6rA_Tk