WILLEMSTAD,- Di akuerdo ku miembro di Frakshon di MFK, Ramón Yung, a bira tempu pa gara e toro ku yama CMC na su kachu, pasó ku keda bira pa tuma akshon, “baka lo hoga na pos”.
Ta ku asombro parlamentartio Ramón Yung a tuma nota di deklarashonnan di direktor di CMC, sr. Gilbert Martina, esta ku ta bai kòrta den gastunan di personal, komokiera ku CMC ta traspasando den situashonnan finansierto difisil.
Kontinuamente CMC ta den publisidat di forma negativo, pasó a para bira ku regularmente CMC ta sali mustra riba kualkier situashon, motibu pa kual nan mester deskontinuá ku operashonnan elektivo. Anteriormente Minister di salubridat sra. Dorothy Pieters-Janga i Minister di Finansa Javier Silvania a sinta na mesa ku CMC. A regla entre otro plaka pa por a kubri gastunan durante pandemia i despues a regla tambe un vorskot di parti di SVB. Na mes momento a mustra CMC ku lo laga NZA (Nederlandse Zorgautoriteit) drenta pa por hasi un investigashon riba entre otro efisiensia, tarifa i redukshon di gastu.
Ta konosí ku resientemente NZA a entregá su rapòrt, pero kual por parti tabata di “tipex”, pasó CMC ta konsiderá parti dje informashon den e rapòrt komo konfidenshal. Realidat ta ku NZA no por a yega na un bista sigur i konfiabel dje situashon na CMC, pasó CMC no ta disponé di sifranan auditá di for di 2018. P’e motibu aki mes NZA ta mustra ku ta difísil pa duna un bista riba efisiensia i kamindanan ku posibelmente por redusí gastu.
NZA a konsehá ku mester hasi un investigashon mas profundo riba e oumento di gastu pa loke ta trata medionan médiko i di kuido, pa kual lo mester yega na kompromiso ku otronan enbolbí den esaki, manera entre otro sindikato i tambe spesialistanan médiko.
NZA ta mustra ku pa por hasi un kalkulashon di gastu i yega na un presupuesto, ta nesesario pa yega na proseduranan i desaroyá regla i instrukshonnan.
Ta konosí ku e sueldonan den sektor di kuido no ta esnan di mas lukrativo, sino un di esnan mas abou. P’esei ta ku asombro Frakshon di MFK a tuma nota dje intenshon di direktor di CMC, sr. Gilbert Martina, esta pa redusí gastu dor di kòrta den e benefisionan sekundario dje trahadónan na CMC.
Gabinete Pisas II a bisa ku e Gabinete aki ta di pueblo, ku pueblo i pa pueblo. Pues ta PUEBLO su bùrt. Na ki momento ku presentá situashonnan di ousteridat, semper ta kòrta serka esnan mas abou i vulnerabel, o sea “bottom up”.
Pero pueblo a vota pa kambio. Pues den kaso di CMC, a yega momento pa kambio i medidanan di ousteridat lo mester ta, “from top to bottom”. Parlamentario Ramón Yung ta spera ku esnan den gerensha di CMC e biaha aki lo sabi di demostrá solidaridat, manera Parlamentario i Ministernan ya a demostrá i tuma e paso pa kuminsa kòrta gastu den nan propio salario i kondishonnan laboral.
Pasó di akuerdo ku sifranan presentá dor di gerensha di CMC mes na Parlamento, te ku luna di yüli dje aña aki, CMC tabatin un perdida akumulá di 148.4 mion florin, miéntras ku e saldo na kreditornan tabata di 104.5 mion, di kual 85.7 mion ta na CMC Vastgoed &Beheer.
CMC a keda di terminá ku e relatonan anual di 2020 i 2021 pa mas tardá dia 30 di sèptèmber último. Frakshon di MFK ta spera ku esei tabata e kaso, pasó sin sifranan anual auditá no por tin un bista real ta na unda i kon mester hasi e trabounan den CMC mas efisiente i asina logra baha e gastunan.
Danki pa duna atenshon na e komunikado aki.
Atentamente,
Ramón Yung
Miembro di Parlamento
Pa Frakshon di MFK
