Deteni pa secuestro: A bay cu yiu sin cu e mama sa

Dialuna marduga alrededor di 12:05 am polis a activa p’un caso di sucuestro. Pa ley, a deten’e pa “ontvoering” pero e realidad ta cu e tata a bay cu e yiu sin autorisacion di e mama. 

A busca e yiu na Dakota y bay cu ne direccion San Nicolas. Su paranda no a dura mucho mirando cu di un forma masha lihe polis a para e auto. A par’e na altura di rotonde Pos Chikito y bay over mesora n’e proceso di detencion. 

E tata ta nenga cu e kier a secuestra su propio yiu. No obstante su opinion, a deten’e y hib’e pa ward’i polis di Playa caminda lo procesa su detencion. 

Tur cos ta mustra cu ta un problema di pareha y cu a bay asina leu cu mama y tata no por regla como hende grandi ken ta cuida e yiu na ki momento.

Polis ta considera e caso aki uno serio pa cual a activa varios patruya mesora pa para e auto y detene e tata. Secuestro di mucha ta sosode regularmente pero pa miedo of berguensa hopi biaha e mayor ta keda keto. Den e caso aki no, e mama a yama polis mesora!