Despues di un lucha cu su salud: Etty Toppenberg a bay sosega

Hopi t’e muchanan di ayera, e hende homber- y hende muhenan adulto di awendia, cu a yega di haya les di Etty Toppenberg. Ken no ta corda Etty, cu su miho amigo, su guitara? Awe a drenta e tristo noticia cu Etty a bay sosega.

E tabata tin 79 aña di edad. Un persona unico den su estilo. Pa hopi tempo e tabata bataya cu e malesa di cancer.Ultimo el a dicidi di no kier sigui lucha mas. Un persona hopi stima, un persona cu semper bay tabata pone ambiente unda cu e bay, e cu su guitara. 

Na nivel internacional Etty a saca cara di Aruba, na Arubadag tambe por a conta cu nan presencia. 

KEN TA ETTY

Alex Edward Toppenberg a nace na Aruba dia 19 di augustus 1943. Su nomber di 

cariño semper tabata Etty. Nomber di su tata ta Gilberto de los Santos Toppenberg y su mama ta Petra Soliana Toppenberg. Etty a nace y lanta den Companashi. E ta 

number shete di e total di diesun ruman, di cual uno a fayece. E tin un ruman cu ta toca piano na Hulanda y su otro ruman Ady tambe ta toca un poco piano. Etty a traha na oficina di impuesto pa dies aña, despues el a bira maestro di scol y nunca Etty a laga musica. 

MUSICA

Etty a uza musica hopi, pasobra ta dos podium bo tin, esun di den klas y esun riba cua bo ta para canta manera e mes ta conta. “Semper a laga nan traha hunto.” P’esey Etty ta un di e hendenan mas afortuna na Aruba. E ta kere cu ta Birgen di Alto Vista den e kapel cu e ta bay tur mainta, ta yud’e cu e ta conforme cu su bida 

y satisfaccion cu Etty ta haya den musica. 

Etty su prome guitara tabata gelijm den otro, pasobra e tabata kibra. Tabatin un carpinte banda di su cas y Etty a cumpra lijm welwood, anto basha esaki, drech’e y pone cuerda p’e. Despues di tempo, e guitara ey a kibra. Etty no sa na unda un hende lo a cay sinta riba dje of ta kico a pasa. 

Etty tabata un persona, musico, hende di tur hende. E tabata manera un censo chikito. 

Di parti di Headlines Group, cas editorial di 24ora.com y TREMPAN nos ta expresa nos mas sincero condolencia na su famia completo. Cu Etty sosega na paz.