Despues di Predicado Real: Nos orguyo nacional a bira “Royal Aruba Aloe”

Ta algun luna pasa cu a anuncia cu Aruba Aloe a haya e predicado pa uza “Koninklijk”. Ta e prome pais pafo di Hulanda cu ta haya un predicado asina. E ta como un honor pa un industria di mas cu shen aña na nos isla. Ayera a celebra e imagen nobo, den presencia di Gobernador y por lo menos dos minister presente.

Remko van der Veldt, director di Royal Aruba Aloe, a comenta cu a transforma Aruba Aloe den “Royal”. Aña pasa dia 22 di april 2021, Aruba Aloe a ricibi e certificado y e Decreto Real for di Gobernador di Aruba, su excelencia Alfonso Boekhoudt, cu ta pertenece na e Predicado Real (Predicaat Koninkljk) otorga pa su Mahestad Rey Willem-Alexander na e compania.

Awo a yega e momento cu a adapta e logo y agrega un corona na dje. Royal Aruba Aloe ta e prome compania Arubiano den region Caribe cu a ricibi e certificado y e Decreto Real aki. Na Hulanda mes tin alrededor di 200 compania cu a ricibi esaki, por ehempel KLM y Royal Schiphol Group.

E cambio cu lo sosode awo ta e imagen y e comunicacion di e compania awo lo ta den nomber di Royal Aruba Aloe, pues ya nan no ta Aruba Aloe Balm mas. P’e compania ta sumamente importante pa ademas di informa tocante Royal Aruba Aloe sino tambe di e historia di Aruba. Den 132 aña Aruba Aloe a crea historia pero tambe ta importante pa informa cu desde 1840, aloë ta importante pa Aruba.

Lo sigui crece

Aña 2023 sigur lo ta un aña di crecemento, Remko van der Veldt, a comenta cu tin plan pa crece na nivel internacional. Actualmente e compania ta conta cu 17 tienda na Aruba y 2 pafo di Aruba. Un di nan ta na Merca y e otro na Hulanda, esaki lo kier sigui expande.

Aña cu a pasa, a expande e tereno di plantacion, awo e ta alrededor di 5 hectar cu ta encarga pa produci e aloe. E compania ta conta cu mas o menos 150 trahado y ta positivo cu den e siguiente añanan por duna empleo na mas persona.

Gobierno: Orguyoso

Minister Geoffrey Wever tabata presente na e ceremonia historico aki y a informa di ta contento di por ta presente. Wever a continua bisando cu el a combersa cu algun invitado tocante e echo cu e industria di aloe tin un laso fuerte cu nos historia economico. Kisas hopi hende no sa pero na cierto momento Aruba tabata e exportado mas grandi di mundo di Aloe, pues Aruba tabata exitoso den e tereno aki.

Prome cu esey tabata fosfaat y na cierto momento a Aruba a bira e proveedor mas grandi di petroleo pa e aliadonan. Awo Aruba ta conta cu un producto turistico cu ta mundialmente reconoci. Cu esaki, e minister, kier demostra su Aruba su modelo economico ta fuerte.

Louis Posner: Dificil pa describi

Louis Posner, accionista di Royal Aruba Aloe, a comenta cu e sentimento ta “dificil pa describi”. El a continua bisando cu e emocionnan cu a bin despues di un nombracion asina ta grandi, no solamente pa e compania pero alabes pa Aruba henter. Den historia di Reino Hulandes, Aruba Aloe ta e prome compania, cu a ricibi e nombracion aki. E nombracion aki, den palabra di Louis Posner ta “algo inmenso”. Posner a comenta cu si mira di unda Aruba Aloe a cuminsa te cu awe, e ta un soño cu a bira realidad. Locual por spera ta cu e compania lo sigui crece p’e bira un pilar importante pa e economia di Aruba. Nan ta comprometi pa sigui traha un producto di calidad caminda Aruba completo ta orguyoso!