Despues di entiero ta bay Colombia: Un di e criaturanan ta temporalmente ciego

Lamentablemente noticia relaciona cu salud di e victimanan di accidente grandi di diadomingo ultimo no ta alentador. Aunke e criaturanan cu a sobrevivi e accidente ta for di peliger y ta mirando mehoracion, tin di informa cu, un di nan actualmente lo ta den preparacion pa efectua vuelo pa Colombia.

Su situacion ta stabiel pero te na e momento aki su bista a bay, cu ta pone cu e ta temporalmente ciego. Ta bisa temporal pasobra cu te ainda no tin conocemente di kico ta locual cu ta ocasiona e condicion aki.

Famia a indica cu lo opta pa biaha pa Colombia cu e criatura pa asina por mira kico ta locual ta tumando cu e mucha y con pa yega na recuperacion di su salud. Ta sospecha cu lo por tin di haber cu e trauma severo cu e criatura a pasa aden durante e accidente grave di diadomingo, pero ta spera cu lo por mira mehoracion pa asina e por recupera di e condicion aki.

Famia mientrastanto ta den preparacion, ta warda pa entiero di e tres miembronan di famia tuma luga diasabra awo, pa asina por concentra nan maximo esfuerso na cuido y recuperacion di e criaturanan aki. Di nan banda, famia ta optimista y ta spera cu e efecto di e perdida di bista aki ta algo temporal y cu pronto e lo por surpasa e trauma y recupera su salud por completo.

Ta momento dificil pa henter famia, ta perdida hopi grandi nan ta aden y ta gradici cada persona y/of instancia, cu di un of otro forma, ta yudando nan den e tragedia aki. Comunidad ta keda pendiente y e famia lo sa di informa cualkier progreso/ diagnostico cu lo bin afo di e biahe pa Colombia.