Despues di bintidos aña: Champions Aruba a cera su portanan

Pa hopi aña restaurant Champions Aruba ta situa den Marriott Aruba Ocean Club. Pero den un carta, e gerente general a informa su clientela y huesped cu e restaurant ta cera su portanan pa semper ta dia 15 di september proximo.

Champions Aruba a habri su portanan na 2000 y pa 22 aña hopi hende tanto local como turista a yega eynan. E gerente general a indica cu Marriott Aruba constantemente ta evoluciona y ta busca manera nobo pa mehora nan producto y servicio, pa asina por brinda miho experencia di vakantie na nan huespednan. Aunke cu esaki ta e capitulo final dje restaurant, ta habri oportunidad pa otro luga di cuminda na e mesun localidad.

Na momento cu Champions cera su portanan, e dia siguiente, esta 16 di september, di biaha ta cuminsa cu e trabounan di renobacion dje localidad aki pa un concepto nobo di restaurant. E concepto aki lo hisa e tipo di cuminda y bebida cu Marriott Aruba Complex ta ofrece. Tambe lo provee su huespednan un experencia diferente pa loke ta trata tipo di cuminda y bebida.

Marriott Aruba ta gradici e asociadonan di Champions pa nan cooperacion y sosten duna n’e operacion y team dje restaurant durante 22 aña. E asociadonan aki cu ta leal lo sigui provee nan bon servicio na diferente outlet den nan Aruba Complex.