Despues di 5 dia: A detene sospechoso cu a causa accidente fatal

Despues cu el a sali for di hospital di diabierna atardi caba, a gosa di henter su fin di siman sin cu polis ni fiscal tabata sa mes, ta te cu ayera cu 24ora.com a publica e noticia, cu autoridad a “lanta fo’i soño” y a activa. Un rato pasa Ministerio Publico a confirma cu awe diaranson pa 11:00 am a detene e sospechoso Stephen Wilson di 29 aña di edad. Ta acus’e di e crimennan “doodslag” y tambe “dood door schuld”. Tin castigo pisa pa ambos di e crimennan aki, si acaso hues hay’e culpabel di e acusacionnan cu tin contra dje awo. 

No ta conoci si polis lo detene e otro chauffeur tambe, pasobra testigo ta insisti cu ta dos colega tabata pustando pa mira ken ta yega trabou prome. Ambos ta traha na un restaurant na Baby Beach y mester a subi warda un rato despues di e desgracia. Na e sitio polis a laga Wilson supla y su test a sali malo, pues a determina cu e tabata burachi. 

Pero door cu el a sinti malo, a transport’e pa hospital pa ricibi tratamento medico avansa. Ey el a bisa nan cu e no por cana. No a determina cu el a kibra pia ni nada. Su cara tabatin rasca, probablemente door di e sla na momento di e impacto. Asina el a keda di diadomingo interna riba piso regular na hospital pero diabierna atardi 5:30 pm dokter a bis’e cu e por bay cas numa pasobra no tin rason medico pa want’e interna. 

Polis a kere, cu hospital lo avisa nan ora cu laga Wilson bay cas, pero esey no a sosode. Es mas, hospital a ripiti mil biaha na husticia cu nan huramento di mantene secreto medico di pashent ta pasa riba tur peticion pa fabor di polis na cualkier nurse of dokter. A splica polis cu e unico manera pa nan haya sa ki ora un pashent ta bay cas, ta su nan pone un hende sinta na porta di e pashent. Como cu polis ta bou presion pa no traha mas di 40 ora di overtime pa luna, a opta pa no pone un agente eynan y confia cu hospital lo yuda den suministra informacion di pashent. 

Awe, despues di cinco dia cu Wilson ta na cas liber, fiscal a duna ordo pa bay busc’e y deten’e mesora. Pues, for di 11:00 am e ta den man di husticia y ta contestando preguntanan cu e polis di trafico tin pa hacie. Na final di dia fiscal lo dicidi si ta encarcel’e pa mas interogacion of si e lo keda cera den KIA te dia su caso penal bin dilanti hues. Depende di su declaracion, lo dicidi si ta detene e colega cu supuestamente tabata pustando cu ne riba caminda publico, cu a yuda causa e accidente cu a laga tres morto atras. 

Fuentenan cerca di e investigacion a sigura na nos cu Stephen Wilson nunca a pasa rijbewijs y cu e auto cu e tabata stuur no ta sigura tampoco. Como tal, e gastonan di hospital, di entiero y pa cria tres yiu chikito te ora nan bira mayor di edad, lo por cay riba e sospechoso, si acaso hues dicidi esey durante tratamento di e caso penal, cu sin duda lo tin un aspecto civil na dje, pa determina e daño material y imaterial cu tipo di accidente asina ta bin cu ne.