Despues di 10 luna: Awe Ady Thijsen ta huramenta como Minister Plenipotenciario

Awe ta huramenta e Minister Plenipotenciario nobo, den persona di e politico mr. Juan Edberto “Ady” Thijsen. E lo huramenta dilanti Gobernador di Aruba como Minister Plenipotenciario. Na Hulanda, separa di ocupa e funcion di minister (cu Guilfred Besaril a bay laga atras), tambe e lo fungi como representante di Aruba den Union Europeo (funcion cu Eddy Paris a bay laga atras).

Durante conferencia di prensa awe mainta, minister-president mr. Evelyn Wever-Croes a desea Thijsen hopi exito cu e reto nobo aki. El a elabora riba experencia di Thijsen riba tereno di husticia y nos constitucion. Segun minister-president, Thijsen lo ta un gran aporte pa Aruba na Hulanda, pero tambe pa representa nos den e reunionnan di Conseho di Minister di Reino. Tambe hunto cu director interino di Arubahuis, Thijsen ta encarga pa trece e cambionan fundamental den Arubahuis na Hulanda.

Un di e metanan ta pa estrecha e lasonan mas fuerte na bienestar di Aruba, cual meta e tin na Hulanda. Asina ey por sirbi e ciudadanonan miho, tanto e studiantenan como otro ciudadano cu ta biba na Hulanda.

Di dos biaha ta purba

Esaki ta di dos biaha cu Partido MEP ta purba nombra Ady Thijsen den funcion di Minister Plenipotenciario di Aruba na Hulanda. Na aña 2017 a purba caba pero e no a pasa screening pa bira minister. Kico a cambia e biaha aki, no ta conoci, pero despues di un trayecto largo, pasobra Thijsen ta na Hulanda desde december 2021, awe ta logra hurament’e. Den pasado Prome Minister a bisa cu e lo huramenta cerca Rey Willem-Alexander na Hulanda pero parce cu e plan ey a cay na awa y awe Gobernador di Aruba mes lo hurament’e na Cas Ceremonial.

Dos funcion pero un salario

Thijsen lo eherce dos funcion, cu ta Minister Plenipotenciario na Den Haag y e otro ta como Representante di Aruba den Union Europeo na Belgica. Wever-Croes a enfatisa cu e lo ricibi un solo salario, pasobra a tende e rumor cu e lo cobra dos salario. Pero cos no ta asina, pasobra e ta bay haya solamente salario di Minister Plenipotenciario.

Tocante Ady Thijsen

Mr. Juan Edberto “Ady” Thijsen tin 63 aña di edad, ta casa y tin 4 yiu y 2 nieto. El a studia ley y ta un abogado di profesion, specialisa den leynan laboral y derecho constitucional. El a drenta arena politico na aña 2005 ora a subi lista di MEP. Den su prome salida el a logra 818 voto, esun mas hopi te dia di awe! Den eleccion na aña 2009 el a cay den voto y a yega 414 voto, net mita. Den eleccion di 2013 el a crece y yega 475 voto mientras cu den e eleccion na 2017 el a bolbe crece y a yega 511 voto riba su nomber. Aunke su preferencia, na 2017, lo tabata e puesto di Minister Plenipotenciario di Aruba na Hulanda, esey no a logra. El a ocupa e puesto di Presidente di Parlamento di Aruba, te ora cu gobierno a cay y a yama eleccion nobo. Den eleccion dia 25 di juni 2021, Thijsen a bay hopi atras den voto y a haya solamente 183 voto riba su nomber. Despues di formacion di gobierno, a opta pa haci Thijsen parlamentario mes y fin di november el a tuma su retiro, habri caminda pa Ricky Hoek drenta Parlamento di Aruba, mientras Thijsen a bay Hulanda den preparacion pa asumi e puesto. A keda cla te awe 13 di october 2022, ora cu e ta huramenta den e funcion di Minister Plenipotenciario di Aruba na Hulanda.