Despues cu famia a protesta: A detene hoben sospecha di “hit and run” fatal

Rosea cayente di comunidad riba autoridad a pone cu den oranan di atardi, a activa e investigacion. Tabatin dos caso di accidente fatal y famia di e di dos caso no tabata sinti cu polis ta haciendo esfuerso suficiente pa yega na e sospechoso. Pero awe nochi laat a detene e posibel sospechoso principal, un homber di fam G. di apenas 24 aña di edad.

Polis a sorprende na su cas situa den Kwihistraat na Ponton, a confisca su auto y deten’e e homber mes tambe pa mas investigacion. Parce cu ta e mes a yama polis y a negocia pa e entrega su mes pero sin mucho fanfaria. Polis a tapa su cara y a haci tur esfuerso pa tene prensa mas leu posibel. Den un caso asina, polis ta haya cu identidad y e “bon nomber” di e posibel criminal tin mas balor cu e dolor di famia cu a perde nan ser keri pa un chauffeur iresponsabel.

Pero tabata ora cu famia di Rosa Martinez di 60 aña di edad, a sali vocifera nan malcontento, cu mesora a nota mas movecion den e Departamento di Trafico di Polis. A logra haya imagennan di video di camaranan di siguridad den e area, cu ta in evidencia clave contra e sospechoso.

Segun polis, pa detene e chaffeur a haci uzo di articulo 4 inciso 2 jo. articulo 40 inciso 1-A y inciso 2-A di Landsverordering Wegverkeer.

Potret di e sospechoso nos ta keda debe nos usuarionan, pasobra polis a sconde pa publico. Nos lo keda vigila si tur hende cu dal hende mata cu auto, lo conta cu e mesun trato di handschoen di felpa pa parti di e ekipo di Departamento di Trafico di Polis.