Despues cu a gar’e ta gaña: Rocco Tjon a admiti di a haya auto nobo

“Manera ta conoci, a sali den cierto medionan di comunicacion, rumornan falso cu Gobierno di Aruba lo ta mal gasta placa di pueblo pa cumpra auto nobo. Mirando cu Land Aruba no por a sigui huur e auto actual di Garage Centraal door cu e lease a yega su fin, a prolonga e lease cu Garage Centraal y awe e auto a wordo cambia”, asina Minister di Husticia y Asuntonan Social, Rocco Tjon a skirbi den su relato di prensa. Esaki despues cu el a cataloga nos noticia como “Fake News”. 

A gara nan di aña pasa

Siendo e medio di comunicacion mas grandi di Aruba, nos a publica cu un agencia di auto a manda busca tres auto nobo pa Conseho di Minister. Un pa Prome Minister Evelyn Wever, un pa Minister Endy Croes y otro pa Minister Rocco Tjon. Tambe nos a bisa cu tur ta surpasa 100 mil florin ora di cumpra y door cu ta lease, na final di e periodo ta sali mucho mas ora agrega, separa pa cumpr’e, tambe pa sigur’e, service e y paga number di auto p’e tur aña. A informa tambe cu den e tres autonan aki, esun di mas caro ta esun di Minister Endy Croes, cu ta alcansa como 150 mil florin na balor di e auto so, pues sin lease ainda!

Di hopi aña no ta cumpra mas

Echo ta cu pa hopi aña, mas cu un decada sigur, DOW no ta cumpra auto mas pa gobierno ni pa ningun departamento, tur ta gelease. Pues tur aut’i polis, duana, etc, tur ta gelease. Pa bisa awo cu nos no a “cumpra” pues cu e noticia ta falso ta un hilaridad. Cumpra of lease, ta pueblo ta paga pa e mandatario core den un auto di luho cu e mes nunca lo por a paga como ambtenaar, den caso di Maduro y Tjon. Cu minister mester auto ta corecto, pero dicon esun di mas caro cu ta bende na e agencia? Ta bon pa resalta cu, di henter e gabinete, cu Minister Geoffrey Wever a opta pa keda cu su mesun auto personal cu e ta stuur pa como dies aña caba. Dicon e si por?

Nos no ta den tempo di austeridad?

Nos critica tabata y ta: Pakico mester lease un auto asina caro? Mientras cu Gobierno a corta den salario di empleado, den beneficio, den remedi pa pueblo, a aumenta schoolgeld, pa recoge sushi, pa parkeer den Oranjestad, a bin cu BBO aan de grens, prijs di gasolin, gas, awa y coriente mas halto cu nunca…con por hustifica cu den tempo di austeridad, ta opta pa luho. Y e mensahe robes aki ta influencia companianan estatal tambe, ora cu director di NV Elmar a opta pa e core awo den un Ford Mustang ultimo modelo, riba custia di tur cu ta paga e coriente di tarifa halto tur luna. 

Tjon: Dowers tabatin tres auto y ami tin un so

Pa por hustifica su auto di luho y caro, e mandatario a pidi pueblo pa tene cuenta cu e gobierno anterior, di seis aña pasa, tabatin mas auto cu ne. “Nos Ministerio tin solamente un auto pa ful e bureau. Caminda e gabinete aterior pa e mesun ministerio tabatin por lo menos tres auto.” Kisas Tjon mester realisa cu p’esey tambe probablemente Dowers no ta minister awe y pueblo a deposita su confiansa den MEP y den dje p’e haci miho cu Dowers. Pero kico a bira e resultado? Pueblo lo sa di duna bo e contesta den e siguiente eleccion!