Departamento di Mucha y Hoben ta sostene proyecto pa mehora cuido y guia di baby

Departamento di Mucha y Hoben (DMH) ta un departamento di Ministerio di Husticia y Asuntonan Social encarga cu e implementacion, ehecucion pero tambe e supervision riba e Ley Kinderopvang Aruba. Desde cu Noemi Maduro a perde su baby Noah den un incidente lamentabel, el a cuminsa move proactivo y a acerca DMH den su rol di henter e proceso di implementacion di e ley di centro di cuido di mucha. DMH a presenta henter e linea di proceso di e ley aki, desde 1998 te cu awo 2022, ilustrando e trabounan haci y tambe unda e proceso a para/pega. 

Maduro a acerca DMH pa forma parti di e Plataforma Veiligheid den Centro di Cuido di Mucha. Den e Plataforma conhuntamente cu diferente stakeholder, manera; WGK, Ambulance, Rode Kruis, DVG y FPNM a enfoca riba e conscientisacion y prevencion pa loke ta trata drumimento safe p’e babynan di 6 siman te cu 1 aña den Centronan di Cuido di Mucha. 

Maduro a bin cu un tremendo iniciativa pa traha riba un poster pa e centronan cu ta cuida baby di 6 siman te cu 1 aña. DMH a contribui den e proceso di contenido p’e poster y tambe percura pa di biaha tin un protocol di drumimento safe den Centronan di Cuido di Mucha, cu ta forma parti tambe di e protocolnan den e documento di Handleiding Kwaliteitseisen Kinderopvang 2022, cu recientemente a bira conoci.  

E poster final ta ilustra e 10 pasonan pa tanto e trahado pedagogico, como e cabesante y kico e centronan mes tin cu tene cuenta cu ne, pero tambe kico mester haci exactamente durante e fase di drumimento safe pa baby. 

DMH ta hopi contento di por ta parti di e plataforma aki y hunto cu diferente stakeholders por traha hunto den un solo direccion cual ta pa e.o. garantisa y fortifica e siguridad di nos muchanan cu ta bishita un Centro di Cuido di Mucha na Aruba.