Denuncia Publico: Falta mas dokter na Eerste Hulp di ImSan

Ciudadano Giovani Arendsz a tuma contacto cu 24ora.com como un ciudadano preocupa pa e situacion cu tin actualmente na departamento di emergencia di Instituto Medico San Nicolas Dr. Rudy Engelbrecht.

Diamars ultimo el a bin cu su yiu homber chikito. E ta conta cu e luga tabata sumamente yen, pero asina mes e no tin keho pa cu e atencion cu el a ricibi pasobra enfermeranan a atende hopi bon. Despues di tur e atencion di e nurse, a haya informacion cu departamento di emergencia ta hopi yen. Inicialmente esey no a preocupa Arendsz, pasobra den ocasionnan anterior, e sa cu toch e ta bay vlot. Sinembargo, e biaha aki a pasa un ora, dos y tres ora ta warda riba turno. Ora el a bati na bentana, a bolbe bis’e cu ta hopi yen.

P’esey e kier expresa su inkietud na nivel medico puntrando ta pakico ta un dokter so tin den emergencia? Enfermeronan ta mannan yen cu pashent cu mester keda bou observacion, sin conta esunnan cu ta warda pafo. E ciudadano a splica cu e anochi ey tabatin ocho hende pafo, tres hende paden y no tabatin caso di emergencia. Asina mes, tabata yegando 12’or di anochi sin cu su yiu a wordo atendi ainda. Arends a tuma e decision di bay sin ricibi atencion pa motibo cu e dokter cu a subi warda e ora ey mester tuma over e casonan y no tabata sa cuanto e lo tarda.

El a hib’e eventualmente na dokter di cas, kende e tata ta gradici ya cu a lag’e haya remedi. Sinembargo, ora e mucha tin keintura y dolor pafo di ora di consulta, ta na emergencia tin cu bay. Arends a sigura cu e ta keda admira y felicita e director di ImSan pa su trabou. Pero ta desea di sa kico ta pasando ultimo siman y lunanan, cu no ta e ImSan cu no ta duna e cuido medico manera debe ser y supuestamente esey ta falta di personal.

Arendsz a puntra kico mester drecha y si e tin di haber cu e ciudadano of cu AZV. El a wordo bisa cu no tin personal. Esey ta su inkietud y loke a motiv’e pa bin haci e denuncia publico. E ta bisa cu na hospital di Playa ta mesun situacion, pero cu antes esey no tabata e caso nunca na San Nicolas. “Comunidad a crece y nos mester ta cauteloso. Personal ta e departamento aki so sa kico e por tin den servicio. E personal aki so por sa e calidad cu e ta duna y aki no tin nada di keha. Pero e ta ripiti, esey ta entre AZV, ImSan si mester pone mas dokter of mas hende pa esey,” asina e tata y ciudadano preocupa a finalisa bisando.