Dentista Abdalhadi Kawaiah a gana caso contra Minister Dangui Oduber

Dia 19 di october ultimo, Corte di Landsverordering Administratieve Rechtspraak (LAR) a tuma un decision den un caso cu dentista Abd Al Hadi Kawaiah a inicia contra Minister di Salud Publico y Turismo, Dangui Oduber. Abogado mr. J. Odor a defende e dentista mientras cu hurista J. Poeran di DWJZ a sali na defensa di gobierno.

Mester menciona cu e hurista no a logra convence e magistrado cu Gobierno tin rason y como tal a dicta fayo na fabor di e dentista. Gobierno tin tres luna pa tuma un decision drechi. A destrui e decision tuma te cu awor.

E caso

Tur cos ta draai rond di un peticion cu Abd Al Hadi Kawaiah a haci dia 9 di januari 2019 pa prolonga su permiso pa practica “tandheelkundige specialisatie van Orthodontist” p’e periodo di 28 di maart 2019 pa prome di juli 2021. E minister deliberadamente a keda sin contesta e peticion y dia 19 di januari 2022 a sali un decision final. Dia prome di maart 2022 caba e dentista a protesta contra e decision di Minister Oduber. Despues di cuater luna cu no a contesta e protesta, dia 14 di juni 2022 a opta pa bay Corte di LAR. Dia 7 di september 2022 a trata e caso den persona.

Locual hues a evalua

E dentista ta keha cu Minister Dangui Oduber a keda sin tuma decision riba su protesta (bezwaar) di dia prome di maart 2022 y cu e no por keda riba un “fictieve weigering” asina. Gobierno di otro banda ta insisti cu su decision di dia 19 di januari 2022 ta contesta riba un protesta mes y cu den un decision asina no ta existi opcion pa bolbe protesta. Riba dje, Minister Oduber ta haya cu dentista Kawaiah no tin ningun derecho mas, despues cu a trek in su permiso pa practica como ortodontista. Pero, hues no ta mira e caso mescos cu gobierno. Specialmente e echo cu gobierno a formula su carta bisando “Het verzoek d.d. 9 januari 2019 van de heer Abd Al Hadi Kawaiah…..het verzoek wordt afgewezen voor voornoemde periode”. Corte ta haya cu e formulacion di e carta di Minister Dangui Oduber ta como contesta riba e peticion y no riba su protesta. Hues ta considera cu e mandatario ta obliga na tuma un decision riba e protesta y ta haya cu e dentista tin interes pa protesta pa haya un permiso, pasobra de facto, el a traha tur e tempo caba.

Decision: Dicidi pa caba!

Hues di LAR a tuma un decision den e caso aki, den cual a declara e protesta di Dentista Kawaiah como valido. Como tal, a destrui e decision di minister (fictieve afwijzende bislissing) y ta obliga Minister Dangui Oduber pa tuma un decision real riba protesta di e dentista den tres luna despues di e decision aki. A dicta cu e minister mes tin cu paga e gastonan di e caso, balora na 700 florin y hasta cu e 25 florin cu e dentista a paga na griffierecht, cu e por hay’e bek. Ambos partido tin seis siman pa dicidi, si nan no keda contento cu e decision, pa apela na Corte Comun di Caribe Hulandes.

Dentista hopi den noticia

Den e prome siman di juli ultimo, a duna Abd Al Hadi Kawaiah su libertad atrobe, despues di como 10 dia cera na ward’i polis. Net na momento cu fiscal mester a pidi hues-comisario permiso pa prolong’e cu 8 dia mas y mand’e KIA, a opta pa yega na un deal cu ne. A lag’e den libertad condicional, mientras cu e investigacion ta continua.

Abogado: Ta AZV mes a trec’e Aruba

Abogado mr. Benvinda da Sousa tabata abogado di e dentista durante e proceso penal y e tempo ey a insisti cu su cliente tin su diplomanan, cu el a studia varios caminda, na Canada, na Merca y na Francia. Es mas, el a sigura cu e dentista aki ta reconoci mundialmente den su ramo. Pio ainda, e ta hasta un miembro activo di e asociacion internacional di ortodontista, e organisacion di Merca y e organisacion di Canada. Riba dje, e ta un orador invita regularmente pa duna lectura, pa siña y duna les na otro ortodontistanan, specialmente den e tecnica moderno cu el a desaroya di sleep apnea.

Aruba tabata sa di su historia na Canada

Riba nos pregunta relaciona cu e tuchtzaak cu tabatin contra dje na Canada, cu si aki na Aruba nan a “overlook” esey ora cu DVG a dun’e licencia pa traha como dentista. E abogado a contesta cu e ta duda cu nan no a tene esey na cuenta pasobra berdad tabatin un caso contra dje na Canada pero hopi aña pasa y un siman despues e por a cuminsa traha bek.

Di otro banda, Abd Al Hadi Kawaiah tabatin nuebe aña caba trahando na Aruba y e ta cuestiona con despues di tanto tempo, cu awo numa diripiente ta ripara cu algo no ta cuadra cu su credencialnan. Es mas, e abogado a subraya locual su cliente a bis’e, cu ta AZV mes a pidi p’e bin traha na Aruba nuebe aña pasa. “Kiermen tin cos straño y awo cu tin investigacion andando, lo mester bay sali na cla”, segun mr. Benvinda da Sousa.

Tabata traha ilegal

E dentista aki tin problema serio awor cu Inspeccion di Medicina na Aruba, IVA, cu a tah’e cu e no por practica mas. Asina mes, ora di deten’e, a sorprend’e cu polis na su consultorio. Tabatin ambtenaar di IVA tambe presente cu polis pa prepara e proces-verbaal y procesa e dentista pa motibo di ta eherciendo trabou ilegal na Aruba. A splic’e na mas cu un ocacion kico e mester haci pa regla su papelnan y su diplomanan y haci e trabou cu el a studia p’e y no eherce locual e no ta capaz ni prepara pa practica.

A tuma DVG dos aña pa activa

Dos aña pasa e conocido dentista Hendrik Marsman a dirigi un carta oficial na Aruba Dental Society, na IVA y na AZV, cuestionando ken of con ta controla e veracidad di diploma y experiencia di supuesto odontologonan cu ta bin establece na Aruba. Ta core duna nan permiso pa practica, compitiendo contra dentista yiu di tera, sin cu e stranhero tin e preparacion cu e ta pretende di tin. Tampoco ta controla si a yega di keha nan, castiga nan y persigui nan pa eror grave den nan trabou.

Dentista no ta un specialista

E tempo ey Hendrik Marsman a cuestiona veracidad di e preparacion di Abd Al Hadi Kawaiah, pa practica como specialista na Aruba, siendo e no ta. A verifica cu Canada, unda supuestamente el a studia, cu a confirma cu e dentista di Algeria, cu a haci su estudio di bachelor di “tandheelkundige” a sigui un curso na Universidad di Toulouse Sabatier III (e ta menciona den su facebook postgraduate, no master) a drenta Aruba y logra registra su mes como specialista (orthodontist) y tabatin contract cu AZV y ta cobra Afl. 650.000,- pa aña y tambe na companianan di seguro particular cobrando tarifa di specialista.

No a controla su diploma

Pa haya un permiso di trabou na Aruba mester viseer bo diploma prome na DVG como dentista (LUT/MB) of como specialista medico (LUG) y despues bo por haya permiso pa practica medicina. Ta cua papel el a presenta na IVA pa viseer su diploma? A viseer of keda sin viseer su diploma? A haya tur e tuchtzaak uitspraak? Asina mes a lag’e traha na Aruba? Un caminda den gobierno a pifia cu no a actua y cera su praktijk y sac’e for di Aruba. Ken ta responsabel… asina dentista Hendrik Marsman a cuestiona.

Caso na Canada y na Aruba

Na Canada e dentista aki a hay’e cu diferente caso na tuchtcollege y a perde 2 caso den hogerberoep, confirmando e casonan. Parce cu e lo a comete fraude, door di falsifica firma di pashent, haya reprimande pa presenta como ortodontista (locual e no ta) y despues di a perde e hoger beroep na aña 2016, el a bin traha na Aruba cerca Dr. Walker cu contract di AZV. Despues di 3-4 luna dr. Walker a stop e di traha na su clinica door di su prestacion clinico. Na Aruba parce ta tin 3 keho contra di dje y un a bay tucht college y resulta den un tuchtuitspraak contra dje. Na Canada e tabatin den un solo caso 17 encargo contra dje cu boetnan halto (riba 10 mil dollar) y a suspend’e durante 4 luna. Den e veredicto ta mustra cu e no tin spijt/remorse di su actonan y ta gañado. Na Aruba ta presenta su mes como ortodontista y tambe tin un scol di “orthodontics”.