Den corte a proba cu Marlyn Gomes a haci mal uzo di su funcion na Ministerio Publico

“Mi cliente no por dera tur e mortonan di OM”, esaki ta loke cu abogado mr. Hart a bisa diahuebs den corte. A acusa su cliente di a malversa placa como ambtenaar den e periodo di januari 2017 pa december 2021. Ta papia di un suma di 4400 florin. Si esey no keda proba, ta acus’e di malversacion siendo den servicio di Ministerio Publico. E di dos acusacion contra dje ta falsificacion di documento.

Marlyn Gomes nunca antes a hay’e envolvi cu husticia y tin casi 25 aña den servicio di gobierno. Cu e caso aki e ta core riesgo di perde su trabou awo. 

Tur cos a cuminsa ora cu algun conoci di dje a pidie haci nan un fabor y e investigacion a cuminsa ora cu a descubri un fout cu el a comete den e sistema pa haci comosifuera e hendenan a paga. 

E personanan cu tabatin debe di boet y cu tabata sa e ta traha na Ministerio Publico, a pidie pa paga pa nan. Tin di nan ta personanan cu kier a haci areglo. Ta papia aki di 6 persona y Ministerio Publico ta bisa cu e suma cu ta papia di dje ta 4800 florin. Sinembargo, tanto e acusado como su abogado ta nenga esaki. Segun Gomes, solamente 6 persona, cu a conoce nan personalmente, a dun’e placa pa paga boet. E otronan e no ni conoce nan.

E mes, aunke su conocemento ta hopi basico, a dicidi di drenta den e sistema pa haci e cambionan. Y e no a hacie manera mester ta. Sinembargo, asina mes a tarda basta pa Ministerio Publico por a descubri esaki. 

A bisa e acusado cu aki ta trata di un echo hopi serio y el a haci mal uzo di su funcion como trahado di Ministerio Publico. Teniendo cuenta cu esaki a pidi un castigo di 240 ora di trabou pa comunidad of 120 dia cera; un castigo di 3 luna condicional y tres aña di prueba.

Pa un relato mas amplio, lesa TREMPAN.