Presidente di Parlamento
Sra. America Francisca
Wilheminaplein 4
Presente
Kòrsou, 30 di ougùstùs 2022
Tópiko: Deliberashon riba relatonan anual ku a drenta Parlamento
Apresiabel sra. Presidente America-Francisca,
E trabou di un parlamentario ta dependé por gran parti riba e informashon konkreto i verídiko ku e tin akseso na dje i ku e ta dominá. Dokumentashon i informashon di e institutonan, manera Ombudsman i Algemeen Rekenkamer Curaçao ta forma base pa por atendé ku tópikonan ku ta relevante pa deliberashonnan i desishonnan den Parlamento.
Ta pa esaki suskritonan ta haña di importansia pa no solamente risibí por eskrito e relato anual di e órganonan di estado, pero tambe deliberá ku nan tokante e informashon di un forma mas profundo. Ta lamentabel ku Parlamento no ta risibí tur relato anual i tambe no ta tur instituto ta finalisá nan relato anual den e aña siguiente. Esaki sigur ta un punto di atenshon, ya ku ta riba e diferente ‘websitenan’ e parlamentario tin di bai buska òf informá serka e minister responsabel.
Durante e lunanan ku a pasa Parlamento a risibí ofisialmente e siguiente relatonan anual:
- Relato anual 2020 di Sociaal Economische Raad (SER)
- Relato anual 2021 di Ombudsman
- Relato anual 2021 di Algemeen Rekenkamer Curaçao (ARC)
- Relato anual 2021 di Raad van Advies Curacao ( RvA)
Suskritonan lo kier deliberá ku kada un di e institutonan aki, tokante e kontenido di e relato anual i posibel akshonnan konkreto. A base di artíkulo 33 di reglamentu di òrdu, suskritonan ta pidi sra. Presidente pa yama un reunion di komishon sentral i ademas ta pidi presensia di representantenan di SER, Ombudsman, ARC i RvA.
Danki di antemano,
Miembronan di Parlamento, Partido Alternativa Real
