Presidente di Parlamento
Sra. America-Francisca
Wilheminaplein 4
Presente
Kòrsou, 1 di sèptèmber 2022
Tópiko: Deliberashon ku Fundashon Kas Popular
Apresiabel sra. Presidente America-Francisca,
Parlamento di Kòrsou a tene riba fecha 7 di yüni i 1 di sèptèmber 2022 un reunion di komishon sentral, kaminda a deliberá ku Fundashon Kas Popular, tokante desishonnan dudoso ku a keda tuma pa ku benta di kasnan den RIF.
Durante e reunionnan aki a bin diferente punto dilanti, entre otro e difikultat enorme ku FKP tin pa hiba un maneho responsabel, sin e sifranan anual i mensual korekto. Segun e direktor finansiero e situashon ta ‘Out of control’. Fundashon Kas Popular ta e úniko instituto ku ta enkargá dor di Gobièrnu ku konstrukshon di kasnan pagabel, spesífikamente pa e grupo di ménos rekurso. Ademas Fundashon Kas Popular tin bou di dje e maneho di míles di kasnan sosial di pais Kòrsou. Esaki ta hasi FKP fundamental pa e nesesidat básiko, esta bibienda, di nos pueblo. Pa kumpli ku e mandatonan aki, FKP ta risibí anualmente 12 mion di pais Kòrsou. E fundashon su bon funshonamentu mester ta di prioridat haltu pa Gobièrnu i Parlamento.
Pa e motibunan aki suskritonan ta haña di vital importansia pa deliberá ku e minister responsabel sr. Cooper, tokante e desaroyonan preokupante na FKP, ku tin su efekto riba desaroyo di bibienda aki na Kòrsou. Parlamento lo kier deliberá den un reunion públiko, kaminda e intenshon ta pa yega na un desishonnan konkreto pa remediá e situashon di FKP mas pronto posibel.
A base di artíkulo 64 di reglamentu di òrdu, suskritonan ta pidi sra. Presidente pa yama un reunion públiko, ku presensia di minister sr. Cooper i representantenan di FKP.
Danki di antemano,
Miembronan di Parlamento, Partido Alternativa Real
