Defensa Hulandes kier reenforsa y amplia su papel na Aruba

No ta su prome bishita na Aruba, pero si e prome den calidad di Commandant der Strijdkrachten. Asina Onno Eichelsheim ta riba nos isla e siman aki. Den un entrevista ofreci na 24ora.com, a combersa cu e di dos persona mas halto den defensa Hulandes caminda el a comparti su punto di bista riba e situacion, reto y oportunidadnan cu Aruba ta representa.

Den su agenda di trabou e tin na prome pa cera conoci cu e personal cu ta basa na Aruba y ta traha bou di circunstancianan extraordinario na cual e ta referi cu ademas di e funcion di defensa, tambe ta colabora cu instancianan local. Manera ta conoci, ademas di brinda facilidad, guia y entrenamento na e programa di Arumil, Defensa Hulandes tambe ta sostene Kustwacht den e lucha contra criminalidad y semper buscando pa estrecha lazo cu e comunidad local.

“Den e proximo simannan nos ta bay pensa riba kico nos por haci extra. Nos a skirbi un functienota y kier inverti den e region Caribense,” asina Commandant Eichelsheim a expresa, ampliando cu esey lo inclui e refuerso di proteccion di frontera, expansion di contacto cu Marechaussee, mas material y ehercicio.

Riba e topico, e comandante a cuminsa na bisa cu Venezuela ta un nacion bisina y pa aworaki e frontera ta keda cera. Ta keda sostene si combersacion encuanto bou di cua condicionnan lo por habri bek. Si ta sigui vigila pa contraresta e trafico humano y di droga.

Un di e aspectonan cu Eichelsheim a papia cu e comandante di Marinierskazerne Savaneta ta pa bin bek cu e Opendag anual caminda por yama pueblo bon bini y reenforsa e lazonan cu comunidad. 

Pa e relato completo, lesa edicion di TREMPAN