Defensa di Benny Sevinger ta cla y yen di confiansa

Diahuebs mainta trempan Ministerio Publico tal cuminsa cu e parti di nan rekisitorio den e caso Avestruz unda cu tin 12 acusado. Un di nan, Mary Winterdaal, ta na Hulanda y a sigui e tratamento via di video conference ora cu a trata su parti.

Despues di a finalisa e prome parti cu ta e hechonan y cu ta cla pa cuminsa cu e di dos parti, defensa di ex Minister Benny Sevinger David Kock y Demis Illes ta sinti nan mes yen di confiansa y naturalmente ta bay pa vrijspraal di tur e acusacionnan. Pafo di Corte Illes a bisa cu nan ta sinti cu e prome parti di tratamento di e caso a bay bon si mira loke cu a bini finalmente den Corte.

Tabata papia na inicio di sumanan di miyones di florin y awe ta papia di malversacion di 11 mil florin, y esaki ta duna defensa hopi mas confiansa cu tur cos ta bayendo bon “y cu nos ta bayendo den e bon direccion.” Nan ta cla pa scucha diahuebs y diabierna e storia exacto di Ministerio Publico, e detayenan di tur e acusacionnan cu Ministerio Publico tin contra e personanan aki. E ora nos lo haya sa exactamente tur loke nan tin den nan acusacionnan. “Pero den nos opinion e ta canando bon.”

Illes a adelanta e punto por ehempel cu nan ta bay concentra riba dje pa desbarata e acusacion di malversacion di 11 mil florin. Asina por ehempel el a bisa cu hopi e gastonan cu e fundacion Curason Berde tabatin, e tabata haci e pago pa nan. Esaki a causa cu e fundacion tabatin un debe cu e acusado cu a sigui crece. Esaki lo bini cune.