Decision ta tuma: Minister Dangui Oduber ta elimina recorte den cuido

Minister di Turismo y Salud Publico, Dangui Oduber, a anuncia awe cu el a tuma e decision pa elimina e recorte di 5.5% den cuido. Esey ta un paso hopi grandi den duna pueblo bek e nivel di cuido medico cu nos a custuma cu ne. Pa e dunadonan di cuido, esaki ta encera cu por conta bek riba e subsidionan di AZV y pagonan corespondiente sin cortamento. Pa pueblo, esaki mester traduci den mas y miho cuido, menos tardamento y lista di espera.

Echo ta cu, door di e pandemia y areglo cu Hulanda, a opta pa corta 60 miyon florin den cuido na Aruba. Niun aña a yega e suma pero a corta rond di 40 miyon pa aña, cu ta hopi. Na Hospital so e recorte a traduci den 19 pa 20 miyon florin menos pa por traha cu ne anualmente.

Ya ta tres aña caba cu Gabinete Wever-Croes I y II mester a atene nan mes na e acuerdo aki cu Gobierno di Hulanda, primordialmente pa motibo di pandemia. Dunadonan di cuido cu no a keda contento cu e decision unilateral aki, a subi trapi bay hues y a scucha di e Magistrado cu e decision ta comprendibel pasobra e pandemia tabatin un efecto devastador riba economia mundial! Pero awo cu pandemia a pasa y cu ImSan, Hospital y AZV ta raporta “surplus” grandi den nan cifranan, aunke tin recorte, ta con lo por hustifica pa keto bay tin recorte? Legalmente por presenta casonan den corte den cual e chens cu Gobierno ta gana lo ta menos. Probablemente p’esey ta opta pa kita for di e maneho aki.

Su tras e dunadonan di cuido ya a cuminsa negocia cu Hulanda riba un areglo nobo. Nan ta yam’e un areglo di mas aña. Eyden ta acorda e forma con por ofrece bon cuido pero pa menos. Mester pensa den esfuersonan cu ta promove eficiencia, cu ta traduci den reduccion di gasto. Asina, por ehempel, AZV ta forsando ImSan y Hospital pa traha hunto, pa cumpra remedi hunto, pa comparti ekipo y personal medico. Esey riba su mes ta yuda baha gasto.

Den e publicacion di Minister Dangui Oduber no a menciona ainda con lo elimina e recorte, si ta di inmediato of pocopoco, si ta pa tur dunado di cuido igual of si pa algun menos cu otro. Tambe ainda no tin claridad si esaki ta conta riba remedi pa aseguradonan di AZV, cu awo ta un peso enorme, specialmente pa e pensionadonan y nos grandinan. Nan ta e grupo cu ta haci mas uzo di e seguro medico, mas ta bira malo, mas ta haya remedi y net nan mester paga remedi den forma “cash”. Otro fuente a sigura nos cu recorte den cuido lo no afecta remedi, pasobra esey ta “un otro areglo” entre Gobierno y AZV.

A splica cu e recorte tabata den e suma di placa cu AZV ta paga na subsidio y pago na dunadonan di cuido general. Door di e decision aki, awo Hospital por ehempel por cuminsa paga trahadonan salario completo, recluta mas personal, haci inversion den ekipo, etc. Respaldo, di otro banda, lo por habri su servicio pa pashentnan cu enfermedad mental cronico, pa keda biba eyden. Por corda cu a manda como 50 pashent cas, cu tur risico cu esey ta trece cu ne.

Pa e contribuyentenan di AZV, esaki ta un alivio. Den sentido cu, cu pandemia of no, tur contribuyente a sigui aporta tur luna di nan salario, pero a haya menos cuido! Pues despues di tres aña awo ta haya loke ta paga p’e tur tempo.

Parce cu otro siman lo bin e anuncio oficial. E maneho nobo ta drenta na vigor desde dialuna awo, dia 1 di mei 2023. Cu esey, lo bin miho tempo awo pa tur dunado di servicio cu ta depende di sosten financiero of compra di servicio di parti AZV.

Por lo menos un sindicato, esun mas grandi den sector di cuido, esta Arubaanse Bond van werknemers in Verplegende Instellingen” (ABV), a reacciona positivamente mesora riba red social. Gina Maduro, cu ta na cabes di e sindicato desde aña 2011 a skirbi: “Un tremendo noticia pa full zorgveld. Despues di 3 aña cu inkorting di 5.5% porfin zorg por hala un rosea atrobe y focus riba e kwaliteit van zorg.” E mas cu tur hende sa di e retonan cu e recorte aki a bin cu ne precisamente pa e personal cu tanto a risca nan bida y di nan famia durante pandemia. Esunnan cu mas a traha, ta esunnan cu mas mester a sacrifica y entrega.

Sindicato ABV ta existi desde aña 1968. E ta representa e gran mayoria di e mas di 1.100 empleado trahando na Dr. Horacio E. Oduber Hospital Desde aña 2013 ABV a haci su entrada den ImSan como sindicato y a haci cu awendia ImSan tin un di e miho CAOnan den cuido na Aruba, hasta miho cu di Hospital! Na october 2015 ABV a drenta SABA via un referendum. ABV a drenta FSLMA (LabHOH) desde aña 2017 y na 2018 ta representa e trahadonan di ex-PAAZ cu a bira Respaldo. Miembronan di ABV ta net den e cuater institutonan cu ta haya lumpsum via AZV.