Debi na un inseguridat den tráfiko,
Asosashon Tráfiko Sigur Kòrsou, Reclassering huntu ku Ministerio Públiko
ta kuminsá ku kurso di konsientisashon
Willemstad – Mirando e situashon alarmante di inseguridat den nos tráfiko aki na Kòrsou, Asosashon Tráfiko Sigur Kòrsou den su esfuersonan pa kumpli ku su meta pa konsientisá usuarionan di tráfiko na un tráfiko sigur, a uní ku Reclassering i Ministerio Públiko pa inisiá un trayekto di “leerstraf”, pa personanan ku kometé un infraskhon den tráfiko.
Asosashon Tráfiko Sigur Kòrsou ta sumamente kontentu ku e stap importante aki. Apesar ku e Asosashon no tin fondo i no ta risibí subsidio, ketu bai ta purba diariamente ya pa 72 aña kaba pa keda kumpli ku nan meta prinsipal, esta di promové seguridat den tráfiko.
Manera ya a indiká e “leerstraf” ta pa personanan ku kometé un infrakshon den tráfiko, manera entre otro pasa den lus kòrá, kore bou di influensia di un òf otro supstansia prohibí, okashoná aksidente den tráfiko. E “leerstraf” ta pa medio di un kurso ku lo konsistí di un training di 5 sekshon durante 2 ora, bou di guiá di ekspertonan riba e tereno. Den e kurso lo bin algun tópiko hopi intresante ku sigur lo toka e pèrsona ku a kometé e infrakshon. Algun tópiko ku lo keda trata den e sekshonnan ta, reglanan di komportashon den tráfiko, e responsabilidat ku e usuario tin na e momentu ku e ta den tráfiko, i konsekuensia di un komportashon inadekua den tráfiko.
E training aki ta gratis pero obligatorio. E partisipante mester partisipá aktivamente na e training i finalisá e 5 sekshonnan ku èksito. Asosashon Tráfiko Sigur Kòrsou, mester raportá despues di kada sekshon kon a bai ku e partispante dunando un komentario nan Reclassering ku na su turno lo entregá esaki na Ministerio Públiko. Si e partisipante no partisipá na e training e ta kore risiko di haña un kastigu tòg.
“Nos ta satisfecho ku porfin nos por a logra esaki. Loke nos ke, ta pa kada usuario den tráfiko mira e importansia di un bon komportashon den tráfiko”, bosero di ATSK Riglène Cristina ta indiká. Nos ta kontentu ku últimamente, mas i mas instansianan i organisashonnan ta aserkando Asosashon Tráfiko Sigur Kòrsou pa duna kurso nan di konsientisashon.
“Poko poko pero sigur, nos lo kana yega na un tráfiko mas sigur, pero nos mester di yudansa di tur hende.”
