Resientemente FFK a publiká un vakatura pa e puesto di Technical and Development Manager. Despues di vários entrevista ku kandidatonan ku hopi potensial e eskoho a kai riba Sr. Dean Gorré pa ta Technical and Development Manager nobo di FFK.
Sr. Dean Gorré no ta un deskonosí den mundu di futbòl mirando e trayektoria largu ku e tin komo hungadó profeshonal ku a militá den diferente ekipo na Hulanda manera Ajax i Feyenoord. Tambe Dean Gorré a dirigí Ajax U-19, Southampton, Eskosia U-16 i durante e último tempu e tabata e ‘bondscoach’ di e selekshon di Sürnam i a hasi un bon trabou ku nan selekshon.
E puesto di Technical and Development Manager lo ta unu dirigí riba e parti hubenil ku lo konsentrá riba e desaroyo di nos selekshonnan di kategoria U-9 te ku U-20. Tambe e lo traha riba plan pa un maneho tékniko di nos selekshonnan hubenil i tambe di futbòl en general aki na Kòrsou. Sr. Dean Gorré lo ta na Kòrsou pa kumpli ku su trabounan na FFK ku e mira pa krea futbolistanan ku potensial pa representá nos isla riba nivel internashonal.
Sr. Dean Gorré sigur lo ta un bon atkisishon pa nos selekshonnan i pa futbòl di Kòrsou kaminda e lo trese tur su sabiduria i konosementu pa desaroyá futbòl hubenil pero tambe futbòl en general aki na Kòrsou. Mester bisa tambe ku Sr. Dean Gorré sigur ta hopi kontentu pa aportá na nos dushi isla mirando ku su señora mama i su kasá ta yu di Kòrsou.
FFK ta yama Sr. Dean Gorré bon biní!
15 ougùstùs 2022
