DCNA ta risibí un donashon di Everon Jackson Hooi via Postcode Loterij di Hulanda, pa konservashon di naturalesa na Karibe Hulandes
Pa medio di e wega di Nederlandse Postcode Loterij (NPL) “Kraak de Koffer, e aktor Everon Jackson Hooi ku di Kòrsou, a hasi donashon di 10.000 euro na Dutch Caribbean Nature Alliance (DCNA). DCNA lo usa e fondo akí pa proyektonan den kuadro di salbaguardiá naturalesa na Karibe Hulandes dor di yuda i asistí e Organisashonnan di Maneho di Área Protehá na Aruba, Boneiru, Kòrsou, Saba, Statia i St Maarten.
DCNA ta hopi agradesido pa e donashon. Naturalesa na e islanan di Karibe Hulandes, manera nan refnan di koral, mondinan di palu di mangel i mondi duende (‘elfin forest’) ta úniko i importante pero tambe frágil i enfrentando menasa di disparsé. Lo destiná e fondo entre otro pa aktividat ku enfoke riba krea refuerso di e kapasidat di personal i e posishon finansiero pa e Organisashonnan di Maneho di Área Protehá, edukashon di naturalesa pa hóben, i promové konsiensia i e sentido di akshon urgente pa kontrarestá e retonan di konservashon (manera kambio di klima) den e parti Karibense di Reino Hulandes.
DCNA & Postcode Loterij
DCNA ta un organisashon non-profit ku a krea pa protehá medioambiente natural i pa promové maneho duradero di rekursonan natural, tantu riba tera komo den awa, na e seis islanan di Karibe Hulandes. DCNA su mishon ta pa salbaguardiá naturalesa na Karibe Hulandes dor di yuda i asistí e Organisashonnan di Maneho di Área Protehá. Ku kreashon di un bos uní, yuda sigurá rekurso duradero di fondo, kompartí rekurso, abilidat i eksperensia i promové konsiensia públiko, DCNA lo por reforsá e ret di kontakto i sostené inisiativanan di konservashon di naturalesa rònt Karibe Hulandes.
DCNA tin un historia di mas ku un dékada ku Nederlandse Postcode Loterij i nan koperashon ku organisashonnan di karidat bou di e nòmber “Goede Doelen“. For di 2008 DCNA a bira un benefisiario kompleto di Nederlandse Postcode Loterij i ta risibí kada aña supsidio anual.
Everon Jackson Hooi
Everon Jackson Michael Werner Hooi (Kòrsou, 30 di mei, 1982) ta un aktor hulandes di desendiente di Kòrsou. E ta konosí pa su papel komo Bing Mauricius den ‘Goede tijden, slechte tijden, pero tambe pa su papel komo Ciro Pieterszoon den RTL su seri ‘De Erfenis’.
