Darlaine Guedez-Erasmus (MEP): Alivio pa nos pueblo ta primordial

Durante reunion publico riba e fecha di 24 di april 2023 a trata e tema costo di bida na Aruba. Si nos mira mundialmente e prijsnan a subi. Na Aruba nos por sinti esaki tambe. Pero si mi kier enfatisa cu Gobierno di Aruba a bin ta traha duro pa asina brinda e pueblo e alivio necesario pa por biba y tambe pa e personanan por drenta bek den e parti mercado laboral pa sigui progresa.

Aki mi por menciona algun ehempel:

• Gobierno a aumenta salario minimo 3 biaha. Un aumento entotal di 216 florin y cinco cen den cinco aña;
• A aumenta pensioen di biehes tres biaha;
• A baha inkomstenbelasting y loonbelasting tres biaha;
• A baha prima di AZV pa pensionado;
• A baha winstbelasting p’e companianan di 25% pa 20%;
• A baha grondbelasting riba casnan cu no ta di balor halto (y a aumenta e belasting riba e casnan di balor halto).

Den e ehempelnan menciona por tuma nota cu a tene cuenta cu tur hende den nos comunidad. 

Aki nos por mira cu gobierno a haci e ahustenan importante y unda cu ta posibel y cu tin mas mester. 

Si nos mira e cifranan di desempleo na Aruba, desempleo a baha y aña pasa 1500 persona a haya trabou bek. Aki por mira cu ta 1500 famia cu por sali pa dilanti, pasobra trabou t’e punto di mas importante pa un persona su bienestar, pasobra e por percura pa su mes. Nos por mira tambe, cuanto curso nobo introduci na enseñansa pa empleo p’asina e personanan por prepara pa sigui drenta mercado laboral. 

Ta importante pa mi por menciona cu gobierno sigur a mira ampliamente unda tur lo por baha e costonan cu extra presion riba nos pueblo y un calculacion hopi responsabel, pasobra ta concientemente y cu analisis di e profesionalnan a haci esaki. Tambe algo hopi importante cu gobierno ta haci ta crea oportunidad nobo p’e ciudadanonan, yuda nan ta independiente pa asina nan por sigui progresa. Gobierno semper ta busca e solucionnan, sigur ta hopi prueba tin di esaki. Semper nos mester keda corda y cu yen gratitud kico Gabinete Wever-Croes I a haci den e periodo di Pandemia y kico tur Gabinete Wever-Croes II ta haciendo pa nos tur riba Aruba.