DAÑO DI OLA TROPIKAL TABATA MINIMAL

WILLEMSTAD – Kòrsou a pasa te ainda relativamente bon den e áwaseru eksesivo ku a kai i e bientunan okashoná pa e ola tropikal Invest 98L ku a pasa nos isla. Esaki Minister di Asuntunan General suplente, Sithree van Heydoorn, i representantenan di Servisio Meteorológiko, Polis, Brantwer i Organisashon pa kombatí riesgo (CRbO) a konstatá un dia despues di e sistema di wer. Minister van Heydoorn, den konsulta ku algun departamento gubernamental, a tuma komo prekoushon e desishon riba djaweps anochi, pa duna skolnan liber riba djabièrnè i a pidi doñonan di trabou pa laga trahadónan kuminsá traha mas lat si tabata posibel. Esaki pa eventualmente por a evitá problema ku tráfiko si mas kaya lo a inundá. Mientrastantu e peliger di áwaseru i mal tempu a pasa i bida por sigui normal.

Meteo a pronostiká den su avisonan di último dianan ku e sistema lo a okashoná áwaseru i bientu fuerte i laman brutu. Den diferente bario manera Steenrijk, Sun Valley, Soto, Rooi Santu, Van Engelen i Klein Kwartier a midi kuantu awa a kai. E montante mas haltu a midi den Van Engelen (57 mm), Steenrijk (54 mm) i Klein Kwartier (51 mm). E montante mas haltu ku Meteo a yega di midi for di tempu ku a kuminsá midi, ta 70,4 mm. Esei ta nifiká ku loke a kai ayera tabata bastante pero no desproporshonal.

Polis ayera a konsehá pa evitá sierto bario ku tradishonalmente ta inundá. Por ehèmpel na Saliña ta tin un problema ora un outo a resultá den roi pa motibu ku no por a mira mas unda e kaminda ta kaba. Den oranan di anochi a pidi yudansa di Defensa pa yuda ku hende i material si eventualmente esei lo tabata nesesario. Brantwer tambe a risibí algun petishon pa duna yudansa. Awe mainta por a konkluí ku e preparashonnan tabata bon i ku ta tin kasonan hopi serio kaminda mester a aktua.

Minister van Heydoorn ta sumamente kontentu ku e manera ku e organisashonnan gubernamental a para kla pa duna informashon i yudansa. Mas kontentu ainda e ta pa konstatá ku spesífikamente piskadónan i doñonan di boto chikitu a sigui e konsehonan di Servisio Meteorológiko pa saka nan botonan for di laman. Esaki ta prueba ku komunidat ta realisá ku e konsehonan di nos ekspertonan lokal ta importante i konfiabel.

Meteo ainda ta vigilá e situashon di laman brutu i ta pidi pa tene kuenta ku e olanan i laman brutu pa kostanan sùit i wèst di Kòrsou te ku djasabra 24 di sèptèmber 2022. E konseho ta spesífikamente pa doñonan di boto chikitu, doñonan di fasilidatnan na kosta i pa landadónan.