Dialuna mainta Minister di Turismo y Salud Publico Dangui Oduber conhuntamente cu Directora di ATA Ronella Croes, a reuni cu un grupo di delegado di St. Maarten, Curacao y Suriname pa asina discuti varios punto cu a wordo estableci den e “contactplan” aña pasa entre e paisnan.
Minister Dangui Oduber a presenta den parlamento un presentacion di e actualisacion di resultadonan di turismo na Aruba y a discuti posibilidadnan di un cooperacion entre e islanan riba tereno di turismo. Puntonan cu a presenta ta: enfoke riba un turismo duradero, desaroyonan di e pais, proyectonan di innovacion, portanan di entrada, desaroyo a base di dato.
Resultadonan a demostra cu for di e entrada di turismo lo sigui inverti ariba diferente mehoracion di e producto Aruba. Entre otro enfocando riba atraccion pa turistanan, strategianan pa atrae mas turista afluente cu ta bin gasta hopi cen den economia di Aruba. Alabes diversificacion ta hunga un papel importante, maske e mercado principal ta bin di Merca, semper ta busca pa atrae turistanan di otro mercado manera di Latino America y Europa.
Minister Oduber a menciona cu e desaroyo y inversionnan pa producto Aruba ta sumamente importante pa Aruba pa sigui inverti den mehoracion den nos infrastructura. Minister Dangui Oduber a menciona cu Aruba a experencia un crecemento grandi den desaroyo di hotel den e ultimo añanan y awo tin cu enfoca riba un turismo sostenibel y duradero, teniendo na cuenta nos naturelasa y tambe loke nos pais por soporta den cantidad di turista.
Minister Dangui Oduber ta expresa cu e delegadonan a keda impresiona cu e presentacionnan y e resultadonan di turismo di Aruba y Minister ta sumamente optimista cu lo yega na un cooperacion y cu tin hopi oportunidad pa traha hunto riba tereno di turismo.
Minister Dangui Oduber ta expresa su gratidud p’e bishita y ta spera cu pronto lo por ehecuta e ideanan aki di traha mas di cerca cu otro denter di e islanan di Caribe.
Comment