Dal abou cu brommer na Santa Cruz: Mes un motociclista burachi a causa drama y keda deteni na Noord

Polis man yen marduga. Ademas di accidente cu auto, a bin atende cu motociclista cu a dal abou na altura di rotonde Santa Cruz. 

Na yegada a bin constata cu e persona aki ta bou influencia y no por a sigui core cu e brommer mas. A duna un rijverbod, cu ta haci cu otro hende mester a bin busca e brommer y hiba e persona aki cas. El a resulta herida y ambulance a bin na sitio pa atende cu ne. El a ricibi algun rasca na cara y boca pero nada di gravedad. Esaki a pasa den careda di 1:30 am.

No obstante cu e tabata bou influencia, algun rato despues a bin constata cu e mes un persona aki tabata riba caminda direccion Noord na stuur di e brommer. A pidi asistencia di polis pa atende cu ne un biaha mas na un bar na Noord yegando Boroncana. E persona no kier a rasona cu familiar, cu a purba convence pa laga nan hib’e hospital pa atende cu su heridanan y laga takelwagen transporta e brommer. Esaki a ricibi basta daño y no tabata den estado pa core mas. Na e bar, el a causa basta drama cu e brommer, desordo formal y mirando cu e ta bou influencia e no tabata scucha di ningun hende. Ora a pensa cu a yega na un areglo pa hib’e cas, esaki no tabata e caso.

Asina mes e situacion no tabata bou control. E persona a lanta cu famia na cas y bira un pelea formal, caminda polis mester a presenta un biaha mas pa atende cu ne. Nan a presenta den area di Merlot caminda a bin topa cu hende y auto memey caminda y discucion formal andando. E biaha aki si no tabatin awa mas pa laba. Polis a detene e motociclista aki y transporte pa warda.

Un anochi en berdad di locura total. Varios detencion y hopi accidente durante e anochi aki.

Si bo kier cambia, tin ayudo

E reto no ta cu bo tin problema di alcohol of droga, sino cu tin ayudo, Mescos cu bo, tin hopi otro ciudadano cu tabatin of tin e mesun problema cu bo y cu ta dispuesto pa comparti cu bo nan storia di exito, cu awe nan ta liber di alcohol of droga. Ta un grupo cu ta topa diariamente na diferente sitio, pa esun sostene e otro y hunto laga e bicio, cu ta caba cu bo famia, bo carera laboral y sin lubida bo salud.

Alcoholic Anonymous Aruba ta existi pa hopi aña caba y tin reunionnan diario, tanto na nan clubhuis na Sabana Liber na Noord of na Weg Seroe Preto na San Nicolas. Pa mas informacion di orario di reunion of pa por bel y papia cu un boluntario, subi e website: www.aa-aruba.org.

“Hende no ta cambia pasobra nan a mira e luz. Nan ta cambia pasobra nan a sinti e cayente”