Curason yena di gratitud: Famia Wouters-Quant a surpasa e suma y ta pidi pa no manda mas donacion

Den tur e dolor cu e famia ta aden, por ta sigur cu e respaldo cu e comunidad di Aruba a brinda nan den nan tristesa tabata di gran consuelo. Despues di a haci nan entrevista den medio di prensa pa asina informa di e necesidad cu nan ta aden pa asina cubri gasto di entiero di nan sernan keri, e pueblo di Aruba a responde na e yamada masalmente.

Cu e fayecimento tragico di tres miembro di nan famia, den e caso aki dos yiu y un nieto, famia Wouters a haya nan den un gasto grandi inespera. Gasto di entiero ta core den careda di 25 mil florin. Un di e victimanan tabata traha y seguro di su compania lo cubri e gastonan di entiero. Pero e preocupacion tabata pa loke ta e gasto di entiero di Mirella (Jennyfer), cu no tabata traha.

E tabata mama di cuater yiu c’un di cinco na caminda y tabata cobra bijstand. Pa e motibo aki e famia a apela na comunidad pa pone man na curason y si acaso tabata den nan forsa, pa yuda locual nan tabata por na e famia aki.

E respaldo cu a drenta tabata inmediato y sorprendente.

Diaranson anochi, famia Wouters-Quant a tuma contacto cu Headlines Group pa asina gradici nan publicacion y sosten, pa brinda nan e oportunidad di por haci e yama na e pueblo via programa di Enfoke, 24ora.com como tambe Trempan, pa comparti nan storia tragico , nan informacion di banco y nan necesidad cu nan ta aden. Na mes momento pa informa e comunidad cu nan a yega te pasa e suma cu nan a fiha como meta y ta apela na e comunidad un biaha mas pa laga e donacion te na e suma aki.

Cu un curason yena di gratitud ta yama danki na cada un cu a aporta, cu e suma a pasa 20 mil florin y a yega pa cubri tur gasto cu tabata encera e entiero. Na mes momento tambe ta gradici RIU Hotel cu a keda encarga di cubri gasto di Joenne Carolina, cu na bida tabata labora na dicho hotel.