Cuminsando cu districto di Noord: SETAR ta instalando fiber na Aruba

Un internet confiabel, stabiel y cu speed super lihe ta un necesidad basico di tur cas y negoshi. SETAR sa cu su clientenan kier acceso constante n’e aplicacionnan riba nan smartphone y smart TV y servicio den cloud, stream film, training online, sigur algun di e cosnan cu por menciona cu a bira importante den nos bida diario.

Pa SETAR semper ta importante pa ofrece lo ultimo den tecnologia y pa e motibo aki ta sigui inverti den un infrastructura nobo y moderno pa nos isla. SETAR ta orguyoso di anuncia cu pa algun tempo caba a cuminsa trece Fiber na tur cas na Aruba y n’e momento aki ta concentra e proyecto den e districto di Noord. E meta ta pa traspasa tur cliente existente cu servicionan di SETAR pa Fiber. Algun bario manera Palm Beach, Kamay, Bakval, Saliña Cerca, Monserat y Turibana ta den proceso pa cambia pa Fiber y SETAR ta den ful preparacion pa e siguiente simannan cambia e barionan Opal, Esmeralda, Topaz, Caya Tibuschi y tur otro barionan den Noord.

SETAR su meta ta pa conecta ful e isla riba e plataforma di Fiber, p’asina brinda Aruba oportunidad di difruta di e beneficionan manera: miho speed, un conexion stabiel na cas of negoshi y den un futuro cercano ofrece speed di 1 gigabit. Den e aña cu ta bin, lo nota movecion constante di nos coleganan di SETAR den diferente districto y bario instalando SETAR su Fiber den tur cas. SETAR, como nos compania nacional di telecomunicacion, ta demostra cu e compania ta cla pa e retonan cu futuro lo trece cu ne.