Cuarenta aña di entretenimento radial

E nomber Maikel Oduber probablemente no ta bisa bo nada. Pero si nos bisa bo “Joe Hernandez”, e ora si bo sa ta di ken nos ta referi. Un persona keto, timido cu otro hende tin biaha, trahando hopi aña na Corte di Husticia pero cu den su tempo liber ta percura pa contagia nos pueblo cu alegria via su programanan na radio. Ta cord’e di temp’i Radio Carina y despues Radio Galactica, cu el a cuminsa hunto cu su ruman defunto Modesto Oduber.

Fuera cu e programa “Oldies 99.9” ta cumpli 31 aña den aire, awe Radio Galactica FM ta felicita e motor incansabel, Joe Hernandez, cu ta cumpli 40 aña den radio difusion.

Ta un persona cu ta trece su programanan cu hopi amor, pasion y dedicacion. Sea ta Memories, Oldies 99.9, Skina di Recuerdos of Ritmo 99.9.

Dificilmente ta topa cu figuranan dedica manera Maikel Oduber den e ramio di radio difusion. Mayoria kier cuminsa awe y ta popular mañan. Poco ta realisa cu pa por yega na exito, tin un caminda largo pa cana. Un caminda den cual lo bo topa cu awasero, biento fuerte, horcan, pero tambe cu dianan alegre cu solo perfecto. Oduber a cana e caminda aki den su carera, a forma su nomber, tin un imagen y mas cu tur cos, tin un conocemento di musica local y internacional manera ningun otro.

Pabien Joe Hernandez y sigui entretene nos pueblo cu bon musica, informacion y ambiente!