Crossing for Prevention: Deaxo Croes kier crea conscientisacion pa prevencion di cancer

Dia 19 di november, e Arubano Deaxo Croes, pa prome biaha, lo purba di landa entre islanan ruman Boneiro y Corsou. Meta di e evento aki ta pa crea conscientisacion pa prevencion di cancer y pa logra fondo pa e tres institutonan di cancer riba islanan ABC: CORESA Foundation Aruba, Caribbean Prevention Center Curaçao y Kanker Fonds Bonaire. 

“Crossing for Prevention”, ta nomber di e evento, referiendo na e evento di 2018 “Crossing for Hope” caminda Deaxo, hunto cu 4 miembro mas a landa di Venezuela pa Aruba, colectando  AWG 123.000,00 pa Koningin Wilhelmina Kanker Fonds Aruba.

Awor aki, 3 aña despues, ainda e reto ta un inspiracion pa hopi pa realisa nan soño. Semper a keda un pregunta: Ki dia y kico e siguiente reto lo ta?

Motiva pa e reto y e  tension cu e accion aki ta trece cu ne, Deaxo kier mustra kico humanamente ta posibel cu forsa, resistencia y perseverancia. Motivando i inspirando otronan, treciendo alegria pa nos hendenan di Aruba, Boneiro y Corsou.. 

E crusada lo ta un aventura di 53 kilometer, cuminsando pa mey anochi for di e punta sur di Boneiro, Red Slave Huts/Peleké pa e punta oost di Corsou.

Pa realisa e desafio aki, mester tene cuenta cu diferente factor manera condicion di lama, con Deaxo ta fisicamente, cuminda balansa y siguridad apropia. Un team di 25 persona, profesional i boluntario, consistiendo di dokter, dietista, coach di landamento, acompañante den kayak, otro landadonan, bushinan, un team di pelicula y tres boto di motor, lo compaña Deaxo realisa e crusada aki. Mayoria di e hendenan aki, ya a yega di compaña Deaxo durante su prome crusada Venezuela-Aruba. Nan presencia ta imperativo pa e evento aki bira un exito. 

Di curason Fundacion Bon Intencion ta apoya e iniciativa aki y ta haci un apelacion na tur cu tin simpatia pa nos Fundacion Prevencion di Corsou pa haci un donacion segun nan forsa.

Deaxo Croes ta un persona unico y un berdadero campeon, cu su capacidad y e accion aki di landa ta haci nos consciente con importante prevencion di cancer ta. Fundacion Bon Intencion ta spera cu nos tur ta realisa esaki.