Corsou hibando competencia fuerte den evento di karting na Colombia

E federacion di karting na Corsou ta haciendo un tremendo trabou pa cu e deporte riba nan isla. Cu yudansa di entre otro Michel Paesch y Gregory Tromp di Aruba, a logra pa yuda e federacion pa cu crecemento di e deporte. A cuminsa cu cuater piloto, awendia ta conta cu mas di setenta. Micheal Marugg ta e presidente di e federacion. Marugg tambe ta na Colombia pa guia e delegacion. Di e setenta piloto cu nan tin actualmente, ta mira riba mas o menos ochenta go-karts.

Mirando cu na Corsou ainda nan no tin un pista, ta uza un parkeerplaats cu ta fungi como un pista. A dicidi di bin Colombia bou conseho di Gregory Tromp p’asina por practica mas ainda. Tur cos ta cla pa e federacion di karting na Corsou ricibi su propio tereno p’asina nan por construi nan pista. E siman binidero nan lo firma un MOU cu e minister di deporte caminda lo traspasa un tereno basta grandi pa nan por bay construi nan pista. “E ta un deporte cu a crece lihe.” Tin hopi interes pa karting na Corsou segun Marugg. Actualmente mes tin como cuater mucha cu ta cla pa cuminsa den mundo di karting. Nan mayornan a cumpra cuater karts nobo, kende nan lo ta e prome pa participa den un categoria nobo cu e federacion lo lansa, cual ta di e edad di tres pa cinco aña.

E presidente di e federacion a duna di conoce tambe cu e hoben Arubiano, Matthew Paesch ta coriendo bou di e bandera di Corsou, sigur un piloto prominente. Pa locual ta e pista, e federacion di Hulanda, KNAF, lo ta esun encarga pa e diseño. E lo fungi tambe como e base pa e winter tour. E inversion lo ta uno miyonario. Hunto cu Gregory Tromp di Aruba,  ta enfoca pa cuminsa mesora cu evento internacional na Corsou. C’un pista na Corsou, e training pa e pilotonan Arubiano por bira mas frecuente. Na Aruba e ta mas comercial. Tromp a menciona cu e pista cu nan lo ricibi lo ta un ‘state of the art.’ Compara cu Aruba, cada dos pa tres luna Corsou ta tene evento, aunke ta riba parkeerplaats pero e intencion ta na su luga.