Corsou: Frontera cu Venezuela lo habri

Via declaracion di Minister Presidente, Gilmar Pisas, a duna di conoce cu ya a manda invitacion pa Venezuela pa por palabra bou di cua condicion por habri e frontera gradualmente.

Minister President a informa cu e encuentro cu tabata tin ayera entre Corsou, Aruba, St. Maarten y Hulanda, tabata pa intercambia di opinion riba e temanan di relacion den exterior, cu ta regarda tur e paisnan den reino. Den e reunion a toca entre otro e tema di Venezuela.

A keda palabra cu lo continua cu e combersacion cu Venezuela di manera cu gradualmente por habri frontera. Lo palabra cu Venezuela e condicionnan bou di cual esaki mester sosode.

Minister Presidente ta duna di conoce cu ya e invitacion a keda manda pa Venezuela pa por bini hunto. El a hasta ofrece pa tene e siguiente reunion cu Venezuela aki na Corsou. Den e encuentro tambe a toca e tema di e impacto cu e guera na Ukraina tin riba e sociedad general cu ta trece subida di preis di crudo y e productonan den supermercado.

Nos tur a nota cu costo di bida ta birando mas caro. Banda di esaki a intercambia riba e topico di crimen organisa trans nacional y con den reino nos mester traha hunto pa por combati esaki. Mas leu Minister President ta duna di conoce cu e reunion tabata uno hopi ameno y constructivo caminda cierto palabracion por a keda haci. E ta bisa di ta sigur cu hunto lo yega na resultado concreto na beneficio di tur e paisnan riba e tereno di relacion den exterior.