Copa Hubenil Gobernador Felipe B. Tromp pa Rebecca Jansen y Rough Riders

Riba Dia di Rey, 27 di april,  durante e ceremonia protocolario riba Parke Wilhelmina, a tuma luga entrega di Copa Hubenil Gobernador Felipe B. Tromp. 

Presidente di Parlamento, mr. Edgard Vrolijk den su discurso a pidi S.E. Alfonso Boekhoudt pa na nomber di pueblo di Aruba, duna di conoce na  Su Mahestad Rey Willem Alexander nos amistad y admiracion na su persona como nos rey. Pais Aruba, den su totalidad ta extende na Su Mahestad nos mas sincero felicitacion pa su natalicio. Deseo di Aruba ta pa nos Creador duna Su Mahestad Rey Willem Alexander hopi aña mas di bida den compania di Su Mahestad Reina Máxima y Su Altezanan Real como tambe demas miembronan di Cas Real. Tambe ta desea Su Mahestad hopi forsa pa por sigui den su funcion como rey di Reino Hulandes. 

Ademas, maestra di ceremonia a anuncia e ganadonan di Copa Hubenil Gobernador Felipe B. Tromp. Tabata un dia special pa e trabou boluntario desplega na bienestar di nos hobennan. Rib’e dia aki a haci entrega di Copa Hubenil Gobernador Felipe B. Tromp. Tromp na e hobennan cu a destaca pa nan esfuerso, danki na nan mayornan y lidernan den comunidad.

REBECCA JANSEN

Durante votacion pa saca un ganado pa Copa Hubenil Gobernador Felipe B. Tromp p’e aña aki tabatin un empate y lot a dicidi cu e copa rotativo ta bay pa Rough Riders. Pero comision a dicidi cu ta reconoce tambe e logronan di e hoben atleta Rebecca Jansen.

Rebecca a ricibi tambe un copa cu ta carga nomber di Gobernador Felipe B. Tromp pa tur su logronan durante e ultimo aña pa e deporte di triathlon, esta coremento na pia, landamento y ciclismo.

Rebecca actualmente tin 17 aña y desde chikito ta activo den deporte, specialmente coremento. Na aña 2019 y 2021 e ta logra e premio Excelencia den Deporte den e categoria femenino di 14 pa 17 aña.

Na februari 2022, Rebecca ta sufri un accidente cu su bais durante entrenamento pa participa n’e weganan Suramericano de de Juventud. El a sufri un caida fuerte cu su bais y ta kibra su elleboog. El a pasa den operacion basta grandi y ainda e ta hayando terapia pa su elleboog. 

Cu su 7 aña el a cuminsa den atletismo. Despues el a pasa over pa mountainbike y atletismo. Pero na final el a scoge pa triatlon. El a haci triatlon pa casi 9 pa 10 aña.

Pa futuro e lo kier mehora den su deporte y sigui representa Aruba den exterior. 

ANGELA GEERMAN

E hoben Angela Geerman di 14 aña di edad a ricibi un premio di estimulo pa su meritonan riba tereno social. Actualmente e ta studiante na Colegio Arubano. 

Angela a splica cu e ta un persona hopi enfoca riba su estudio y cu esaki e por yud’e den futuro. E gusta yuda otro, ya cu p’e niun hende no ta merece un mal trato. 

Cual ta su meritonan? Angela a forma parti di e Proyecto Gen297, un programa despues di oranan di scol pa hobennan di scol secundario auspicia pa Asociacion Trabou di Hubentud pa Aruba (ATHA).  Meta di e proyecto ta pa yuda hobennan desaroya nan personalidad, habilidad y conocemento. Un otro aspecto tabata pa guia nan hunto cu nan mayornan. Den e proyecto Gen297, Angela tabata un participante y tambe un boluntario pa yuda cu tur tarea. 

E aña aki Angela a participa den e Proyecto “Aruba Doet” pa yuda verf e edificio di ATHA na Santa Cruz. Asina cu oportunidad presenta, Angela a sa di ta un boluntario pa otro proyectonan pa instancianan no-gubernamental.

Angela ta contento cu su premio pasobra cu e por habri wowo di hende, cu e por duna motivacion pa nan tambe haci nan best. Nada ta bay perdi, tin un motibo su tras. Loke bo haci por tin un impacto riba hende sin cu bo mes sa. 

Ora cu e caba cu su estudio na Colegio Arubano, e lo kier sigui studia microbiologie na Hulanda. 

ROUGH RIDERS

Team di ciclismo BMX Rough Riders cu a bira ganado di e Copa Hubenil Gobernador Felipe B. Tromp pa aña 2023. 

Lianne Pieters, mayor di un di e hobennan a splica cu na 1984 a bin hunto y a funda Rough Riders, pero oficialmente su fundacion tabata na E team a keda funda oficialmente na aña 2012

Durante aña 2022 te cu april 2023 e hobennan, di edad di seis pa diescinco aña a sa di destaca localmente y na nivel internacional.

Actualmente tin diescinco miembro activo cu ta  train regularmente y prepara nan mes pa careda local y internacional. Pa loke ta concerni e participacion internacional, mester menciona cu tur gasto ta keda cubri p’e propio team y e mayornan. E fondonan cu nan ta recauda ta pa medio di actividad manera bendemento di cuminda, bolo y rifa.

Y tur inversion den material manera uniform y bicicleta tambe ta cubri p’e propio coredonan y nan mayornan. Nan no ta ricibi niun ayudo di Gobierno di Aruba. 

Durante 2022 y 2023, Rough Riders a gana varios careda na Aruba organisa pa diferente team y Aruba Wielrenners Bond.

Tres coredo a gana e titulo di Campeon Nacional di Aruba, cuatro coredo a bay cu e premio di Sub Campeon Nacional di Aruba y tres coredo a logra e di tres luga di Campeon Nacional di Aruba. 

Na nivel internacional e hobennan a participa na caredanan na Merca, Colombia y e Campeonato mundial na Francia. E team a logra trece un total di nobenta y cinco trofeo Aruba.

Cu e premio aki ta demostra cu ‘hard work pays off’, ta estimulo pa nan por sigui padilanti. Den nan resultado di scol ta refleha e training- y planning, cu ta algo cu ta stimula mas ainda pa sigui bay dilanti den e sport. 

GOBERNADOR FELIPE B. TROMP

Gobernador Felipe B. Tromp tabata un persona c’un amor grandi pa e persona cu tabata haci un of mas trabou boluntario. Specialmente riba tereno di formacion di nos hobennan. Nan tabata miembro di varios organisacion cultural cu a traha na bienestar di Aruba. pa esaki tambe ta reconoce su persona door di haci entrega di Copa Gobernador Felipe B. Tromp.