Contrario na Minister Glenbert Croes: ELMAR ta sigura recibonan ta bon

ELMAR a haci un investigacion di e proceduranan ehecuta pa e ultimo recibo di cobransa di luna di september 2022. ELMAR ta consciente cu e prijs di coriente nobo tabatin un impacto considerabel den nos comunidad. Manera ta conoci, pa motibo di aumento di prijs di energia na nivel internacional, e companianan di utilidad a haya nan mes obliga pa ahusta nan tarifa pa asina nan por sigui funciona pa sirbi nos comunidad y economia di Aruba.

Riba peticion di Ministerio di Energia y Utilities, ELMAR a haci un revision di tur procedura y calculacion haci di e recibo di september. E luna di september tabata e di cinco luna mas cayente den 143 aña cu ta midi temperatura na mundo.

Situacion di tempo
Durante e luna ey di september e consumo di kWh a subi considerablemente pa motibo di e inmenso temperatura cayente. Pa colmo durante di e temporada aki, biento tambe a cay pa motibo di tormenta y horcan den region, e medio ambiente riba nos isla a bira mas calor cu normal y sofocante. E factornan aki a contribui na un consumo mas halto di coriente pa haya alivio di e calor excesivo. P’esey e consumo di coriente durante e luna di september 2022 a registra un record nunca bisto di ‘peak load’ di megawatt cu ELMAR y WEB a publica.

Asunto di factura
ELMAR a haci un investigacion riba e parti administrativo. Durante e investigacion ELMAR no a haya ningun factura di coriente cu no ta conforme e aumento di prijs di coriente di 24%, esaki ta pa locual ta e tarifa. E consumo total na kWh ta defini e prijs total cu e cliente mester paga a base di cada bracket residencial. ELMAR a haci un investigacion tambe riba e lesamento di meter (funcionamento di e meter) y tampoco no a haya ningun meter di ELMAR cu no a pasa e ‘nauwkeurigheid’ test. Tur meter di ELMAR ta certifica cu un ‘nauwkeurigheid’ test for di e fabricante. Si encaso bo ta di opinion cu bo a wordo factura mas cu e aumento di prijs di coriente di 24%, por fabor pasa na cualkier sucursal di ELMAR, of por tuma contacto cu nos departamento di servicio di cliente via e-mail na [email protected], of yama na 523-7100.

E dianan di cobransa
ELMAR ta haci uzo di un ‘third party’ pa lesamento di meter di coriente. Un grupo grandi di cliente a wordo factura pa un periodo di 33 dia di consumo, door cu e fecha di lesamento di meter durante september 2022 a cay riba un weekend. E fecha di lesamento di meter ta depende si e fecha ta cay riba e dianan di fiesta of no riba dianan di trabou. Pa es motibo aki e periodo di consumo por varia entre 28 dia pa 33 dia cu un total di 365 dia di consumo. ELMAR a logra yega na un acuerdo nobo cu e ‘third-party’ pa nan cuminsa traha durante dianan di fiesta of no dianan usual di trabou. Asina por mantene e periodo di consumo te cu un maximo di 31 dia di awo en adelante.

Areglo di pago
ELMAR semper a ofrece un solucion na nos clientenan cu ta haya nan mes den dificultad pa por cumpli cu pago. Pa acomoda e casonan critico di luna di september 2022, nos clientenan por cera un acuerdo di pago pa asina cubri e retraso den mas luna, pa evita asina cu por desconecta e meter di coriente. Pa cera e acuerdo aki, nos clientenan por pasa libremente na ELMAR, of bishita www.elmar.aw/payment-arrangement-application/areglo-di-pago.

ELMAR su investigacion lo sigui y ta haci un apelacion na e comunidad di Aruba pa sea consciente cu consumo di coriente. Tuma un momento tur dia pa revisa bo cas y paga e aparatonan cu no mester ta cendi of den uzo.