Confirma pa autopsia forensico: A conclui cu Elida Arteaga a fayece door di suicidio

Un caso lamentabel cu a conmove henter comunidad, a tuma luga dia 30 di november, na un cas na Savaneta. Un hoben studiante na Universidad di Aruba a perde su bida den circunstancia penoso cu a pone su famia den tristesa inmenso.

Headlines Group ta aclaria prome cu cualkier otro informacion di e caso aki keda comparti, cu nos maneho, pa basta aña caba ta, cu na momento cu ta trata caso di suicidio, cu nos reporteronan no ta cubri esaki bou ningun circunstancia. Mirando e embergadura di henter e caso aki, a opta pa trece un reportahe final cu e informacion oficial di kico a tuma luga referente e peticion di autopsia y con a cera e caso.

Tambe nos a evalua cu e mayornan mes a bin cerca nos cu peticion pa papia y duna informacion di e caso. Nan mes a papia den ENFOKE pidiendo autoridad y Hospital pa duna nan e chens pa haci un autopsia cu nan yiu. Ta despues di e entrevista aki, cu a conta cu un audiencia masha grandi, cu e bala a cuminsa lora, te cu finalmente e famia a logra den nan lucha.

Detaye di e caso

A bin haya curpa sin bida di, Elida Arteaga di 26 aña di edad, den un cas na Savaneta. E tabata keda pa algun dia den e cas debi cu el a haya problema cu su pareha y a puntra e famia, cu e conoce, si e por a keda algun dia. E famia a biaha y el a keda su so den e cas. E diadomingo ey el a bay na su ex-pareha pa coy su ultimo pertenencianan cu a keda eynan ainda. Na final el a bisa su amiga cu e proceso ey a bay hopi malo. Ora a puntr’e kico kiermen cu el a bay malo, si el a maltrat’e of kico a pasa, e no a contesta mas.

Na momento cu a cuminsa sinti su falta dialuna, a pensa cu lo e ta den problema amoroso y no kier papia cu niun hende. Diamars a sigui purba pero a nota cu e no ta ni “read” e mensahenan via whatsapp. Ora mas conoci a cuminsa haya su falta, finalmente anochi a manda un amigo comun pa bay busca su drechi na e cas. Y ta e ora ey numa, como dos dia despues, a bin topa cu ne den e cas pero lamentablemente sin bida. A indica cu lo por ta trata di por lo menos dos dia caba sin bida. Pa logra drenta mester a kibra porta di e cas aki.

Niun hende a acerca e ex-pareha

A cuminsa sali informacion di un of otro discusion di pareha, cu ta locual a lanta sospecho cu ta algo otro lo por a tuma luga. Cu ta trata di un homicidio/un crimen y pa e motibo ey tabata kier un investigacion profundo pa descarta e posibilidad ey. Cu e relacion a yega na un final basta turbulento y cu na momento cu el a bay busca su pertenencia, esaki no a bay mucho bon. Manera hopi ta nomin’e, un relacion toxico. Pero ironico ta, tur hende sa cu e relacion a caba asina, pero ningun famia of amigo a yama e meneer Hulandes aden pa puntr’e kico por a pasa cu a conduci cu e mucha muhe a tuma un decision asina drastico!

Kico a lanta e sospecho?

Marca na curpa y huña kibra ta e di dos sospecho cu a hiba e famia na pensa cu ta trata di algo otro. Riba esey a splica nan cu ora un curpa para pa un bon rato, sin bida y sin circulacion di sanger, cu unda e curpa keda wanta por aparece un marca. Nan ta bisa cu e sanger ta cuaha. Cu e pianan ta yega casi na suela tambe tin un splicacion, debi cu e mucha muhe a kibra su nek den e acto.

Famia no a acepta cu a cera e caso

Mas speculacion a cuminsa circula relaciona cu e caso aki. Un discusion algun dia prome cu su pareha, cu segun por a compronde ta un docente. A bin topa cu e curpa den e camber di e cas, autoridad a presenta, a constata morto y tur cos a indica cu el a tuma su mesun bida, como tal e no lo ta un caso complica y lo cera esaki, practicamente inmediato.

Esaki ta locual cu e famia no a acepta. A cuestiona mesora dicon autoridad no a haci un investigacion mas profundo mirando e duda cu e famia ta aden e momento ey. Si acaso e dokter no a mira algo for di lo normal y si no por cuestiona e ex-pareha un poco mas riba e discusion cu a hiba na finalisacion di nan relacion. Locual cu famia a pidi ta pa no cera e caso y pa pidi un autopsia. Autoridad a purba splica e famia cu si nan no tin indicacion di un hende cu kier a haci e mucha muhe daño, cu riba su curpa en todo caso, no ta mira motibo pa mas investigacion. Es mas, e mucha muhe a bay na otro organisacionnan algun dia prome pa pidi ayudo cu su depresion, pues kisas e famia no tabata sa, pero e mucha muhe tabata buscando ayudo!

No ta mira motibo pa un autopsia

Ministerio Publico y Cuerpo Policial tambe a tuma nota di e incertidumbre cu a lanta den comunidad relaciona cu e caso aki y tur locual cu tabata comparti riba red social. A informa, na prome luga e famia, como tambe e comunidad cu no a mira evidencia algun cu por sugeri cu un acto criminal a tuma luga. For di investigacion a conclui cu por descarta cualkier ponencia treci dilanti cu lo ta trata di un asesinato.

Famia mes a paga pa autopsia

Mirando cu autoridad no lo continua cu un investigacion, ni tampoco pidi pa un autopsia, famia Arteaga a haya nan confronta cu e realidad cu cualkier peticion pa un autopsia lo cay bou di nan propio gasto. Hospital a cobra Afl. 350,= pa haci un autopsia clinico, pasobra esey so por haci via LabHOH. Hopi lihe hospital a compronde cu no ta esey ta locual famia kier sa, sino mas bien con nan ser keri a fayece. Pero esey no ta un autopsia clinico, sino e ta bira un autopsia forensico criminal. Y esey hospital no por y no tin e dokter ey den cas tampoco. A debolbe e famia su placa bek y a referi nan na Ministerio Publico.

A pidi pueblo pa yuda cu placa

Su colega di scol a habri un cuenta riba Go Fund Me y a logra colecta mas cu €10.000 den algun dia memey di 429 donante. Cu e placa ey lo mester a yuda cubri e autopsia y entiero. Pero, e mama di e mucha muhe tambe a pone su cuenta di banco riba red social pidiendo pa donacion mientras cu den varios negoshi tabatin un box disponibel. Cuanto placa a recauda, no ta conoci. Tampoco con lo uza e fondo publico aki awo.

A haci autopsia

Despues di hopi insistencia di famia hunto cu e cobertura di media, na un dado momento autoridad a compronde cu pa e paz mental di tur cu stima Elida, ta inportante pa ta 100% di kico a sospde cu ne den e ultimo rato di su bida. Hospital a yega na un acuerdo cu Ministerio Publico cu a pone Dr. Gorgoza na diaposicion pa conduci e autopsia forensico aki, cu a tuma luga diamars, dia 13 di december ultimo. Ken a cubri e gastonan no ta conoci pero un fuente a sigura cu probablemente Ministerio Publico mes a core cu e gastonan, aunke no tabatin un investigacion penal andando.

Dokter di gobierno a haci e autopsia

Contrario na loke mayoria hende ta pensa, Dr. Horacio E. Oduber Hospital mes no tin un specialista den servicio directo cu ta haci autopsia forensico ora ta sospecha cu un persona a perde su bida debi na un crimen. Hopi aña pasa Dokter Gorgoza tabata traha pa hospital pero el a baha cu pensioen. Awendia e ta traha directamente pa Gobierno di Aruba, via Ministerio Publico, cu ta manda yam’e solamente ora cu mester haci un autopsia asina. Y den un caso asina, ta Gobierno mes ta pag’e tambe, mientras hospital unicamente ta pone e facilidad disponibel. Como tal hospital mes no ta responsabel pa e diagnostico, cu ta keda den man di e specialista pensiona y Ministerio Publico, cu ta esun cu ta contrat’e.

Resultado di autopsia

Dokter Gorgoza a saca afo cu e causa di morto di Elida Arteaga tabata suicidio. A comunica esaki na su mayornan, cu a bisa desde un principio cu nan lo acepta resultado di e autopsia forensico, sea cual sea e diagnostico di e dokter specialisa den e tipo di investigacionnan asina. Detaye di con e dokter a yega na e conclusion ey ta famia so sa, pero a kita tur duda cu e lo por tabata un acto criminal.

Lo dera otro siman

Despues di realisa kico a pasa y conforme cu boluntad di Dios, famia a dicidi cu lo dera Elida otro siman mes. E acto di condolencia y despedida ta tuma luga dialuna awo, 19 di december 2022, entre 7:00 pm y 9:00 pm na Aurora Funeral Home. Despues lo sigui e acto di cremacion den seno familiar.

Mensahe:

Pa tur problema tin solucion. Sa cu tin departamentonan di gobierno, tin fundacionnan, organisacionnan, religiosonan of un psicologo cu lo por papia cu bo, scucha bo y yuda bo sali di e problemanan cu ta rondona bo y tin biaha parce cu no por soluciona. Pidi ayudo, papia cu un hende di confiansa y yudansa lo yega. Pone un fin na bo bida hamas por ta solucion pa ningun problema. E dolor inmenso cu bo ta bay laga atras pa tur cu ta stima bo y aprecia bo, no ta husto. Pens’e bon y sa cu si bo pidi pa ayudo, lo bo haya ayudo y sosten mesora.