Competencia di domino prome cu aña termina

N’e amantenan di domino “fuerte”, e last lap, e ultimo temporada pa demostra ken ta dokter den pega weso, ta bay cuminsa diabierna awor 25 di november, cuminsando pa 8:00 pm n’e unico Domino Square Garden aya net n’e grens entre Calabas y Kudawecha. Manera semper, entrada ta completamente gratis y durante halftime e snacks famoso di chef lo lora completamente por nada.

E prome dos teamnan cu lo habri e “eindseizoen” lo ta nada menos cu Team Red Stone, yTeam Playa. Team Red Stone no ta desconoci den e palacio di domino caminda na varios ocasion nan a yega di causa sensacion y te hasta consternacion. Di otro banda, Team Playa ta conoci como un grupo bakia den e wega di “contraspionahe” y lo sa con pa maneha e “creatividad” di Red Stone.

Pues fiel fanatico dje bon y unico ambiente di domino “freestyle” aya n’e famoso Domino Square Garden, e dushi temporada di fin di aña, conoci bou nomber “Nos cu Nos”, lo cuminsa un biaha mas diabierna awor, 25 di november, pa 8:00 pm. Entrada ta completamente gratis y e pasapalonan di halftime lo lora manera di custumber totalmente por nada.