Comisario Candelaria: Polis no a descansa te ora a pone man riba agresornan di turista

Riba 26 di december 2022 a tuma luga un caso hopi tristo. Por consider’e un sla duro pa turismo. Un grupo di hoben bandido a haya ta bon di agredi un turista y lag’e seriamente herida atras. E turista ta procedente di Canada y tabata pa algun ora di bishita riba nos isla, el a yega Aruba cu un barco crucero. E nunca por a biba pensa cu su vakantie lo termina den un tragedia y mas aun na Aruba.

Robert Candelaria ta comisario di Cuerpo Policial, durante un entrevista cu representante di Headlines Group, kende ta e cas editorial di 24ora.com y TREMPAN, el a conta cu; e ta un prioridad pa ora tipo di caso asina tuma luga, pa polis activa mesora y atende cu e caso, ta locual cu a sosode tambe.

E caso tabata uno di importancia pa Cuerpo Policial mirando cu ta trata di un victima turista, pa cual; turismo ta e unico pilar economico di nos isla. Candelaria a subraya como hefe di departamento di recherche cu, varios departamento a uni pa traha mas lihe posibel pa yega na detencion di e sospechosonan aki.

No a dura mucho cu a bati na porta di diferente cas pa lanta hende cu ta envolvi. A bishita un cas na Pos Chikito caminda a detene dos persona, un mama y yiu. Segun a compronde, e mama a keda algun ora tras di tralie mientras e yiu tin confirmacion cu tabata envolvi. E yiu a canta estilo Ana Gabriel riba e otro sospechosonan envolvi. A sigui investiga y danki na diferente compania cu a contribui cu camara di siguridad; a bay over na detencion di dos persona. Ambos ta hende homber. A detene nan na un cas na Jan Flemming.

Candelaria a duna di conoce cu no ta descarta cu mas detencion lo cay, ta hasta stimula esunnan envolvi pa entrega nan mes prome cu polis bati na porta. Aruba ta keda e isla pa sigur den Caribe, comisario Candelaria a enfatisa. Ta trahando riba e parti preventivo, ta poniendo camara den e area.