Comienso di aña e ta bula: Miss Aruba cla pa competi den Miss Universe na New Orleans

Despues di nuebe luna di preparacion fisico, mental, verbal, emocional y social, Kiara Arends, Miss Aruba lo subi avion atrobe. E biaha aki e ta rumbo pa New Orleans, Louisiana, caminda e certamen maximo di beyesa Miss Universe lo tuma luga. Kiara lo biaha dia prome di januari cu United Airlines pa Washington, caminda e lo pasa e anochi pa despues sigui cu su vuelo pa New Orleans.

Dia 3 di januari e lo ta busca di e hotel cu e ta y hiba pa e hotel caminda tur 86 candidata lo mester hospeda durante e competencia. E candidatanan mester registra personalmente na e organisacion entre 3 y 6 di januari venidero. Di eynan caba competencia ta start, ya cu for di e momento ey ta huzga nan riba tur movecion cu nan haci y lo tin tambe diferente competencia cu lo tuma luga prome cu e anochi final cu lo ta dia 14 di januari.

Kiara ta hopi honra di por representa su isla, cu a dun’e un sosten inmenso desde e dia cu el a keda corona como Miss Universe Aruba 2022 te cu e dia di awe. E no por keda sin gradici tur e personanan cu di un of otro forma a yud’e pa e por representa Aruba manera mester ta. Mester bisa cu e lista ta hopi largo. Nan kier a enfatisa tambe cu hopi di e ayudonan aki tabata “mankracht”, pues den forma di conseho, fabor, cose of drecha paña, traha sticker pa maleta, traha video y/of voice overs, saca potret, les di makeup y cabey, les di pasarela, training di speech y hopi mas.

Kiara Arends ta gradici tur persona y compania cu a sosten’e, yud’e pa haci esaki bira un realidad. Aruba, nos ta warda boso dia prome di januari pa 2:00 pm pa hunto desea Kiara Arends tur clase di exito pa cu e certamen number 71 di Miss Universe.