Comerciantenan Uni Aruba: Duana lo honra pago di invoerrechten riba descuento

Pa hopi aña ora di cumpra algo riba descuento, Aduana no tabata acepta e recibo di descuento pa ora di paga invoerrechten. Esaki tabata un preocupacion pa Comerciantenan Uni Aruba (CUA). Pero awo a bin cambio riba esaki y durante conferencia di prensa nan a indica di ta satisfecho cu a yega un acuerdo riba e parti di descuento riba recibo ora di bestel algo.

Frans Ponson, presidente di Comerciantenan Uni Aruba (CUA), a indica cu nan ta hopi critico riba diferente cos di gobierno. Manera ta trece resolucion, ta trece critica riba cos, pero nan a trece dilanti un preocupacion cual tabata factura di Aduana. El a indica cu ora di cumpra algo y tin descuento riba dje, Aduana no tabata acepta e prijs di descuento. Esey tabata algo cu a bin na atencion di CUA, pasobra e tabata pasa hopi mes. Esey a pone cu nan a trece e preocupacion aki na gobierno, unda nan a haya oido. E grupo di director di Aduana a sinta cu CUA, cual reunion a bay hopi bon.

Durante e reunion aki Aduana a trece dilanti nan punto pakico nan no tabata acepta esey. Esaki ta pasobra e leynan tabata anticua. CUA a trece su puntonan y a haci hunto cu nan hende, kende legalmente a mustra pakico mester acepta esey awendia. Aduana a bay bek pa sinta cu nan grupo y despues a bin bek bisando cu nan ta acepta esey.

Ponson a indica di ta contento cu CUA a haya oido, pero cu Aduana a sali dilanti bisa di ta bay acepta e descuento. El a splica si un so ta haya descuento, esaki no ta valido. Pero si ta riba Amazon, Ebay of cualkier plataforma di internet cu tur hende ta haya descuento, y mustra e credit card cu esey ta loke a paga, desde awo Aduana ta acepta e descuento. Bisando esaki ta paga e invoerrechten riba e prijs ey. Presidente di CUA a duna ehempel di Black Friday unda por ehempel un television ta costa 400 dollar pero a hay’e na 300, esey ta significa cu ta paga invoerrechten riba e prijs ey so.

Esaki ta un logro pa Comerciante Uni, e ta kere. Segun Ponson, hende ta bruha pasobra CUA no ta bringa pa comercio so, pero ta bringa pa ful pais di Aruba. El a enfatisa cu si pueblo tin menos placa den nan saco, comercio tambe ta haya menos. Den e caso aki e tabata un victoria pa henter Aruba, pasobra nan ta bay resta mas placa y paga menos den invoerrechten.