Comerciantenan Uni Aruba (CUA): A haya reaccion di hopi hende menos di gobierno

Na salida for di reunion cu sindicatonan SPA y SIMAR diamars mainta, Frans Ponson di Comerciantenan Uni Aruba (CUA) a comenta na 24ora.com cu e encuentro a bin como reaccion di e conferencia di prensa cu e organisacion comercial a duna siman y su obhetivo unico tabata e intercambio di informacion. “No tin nada echt concreto. Nos a intercambia algun informacion y por ta den futuro lo tin mas reunion,” asina e comerciante a indica sigurando cu tabata mas bien pa estrecha laso ya cu ta prome biaha a sinta hunto. 

Biniendo bek riba e conferencia di siman pasa den cual a papia riba calculo inhusto ora di cobra invoerrechten, aumento di tarifa di awa y coriente y introduccion di BTW, Ponson a bisa cu “a haya hopi reaccion; mi tin di bisa hopi mes, mas di loke a spera. Nos a wak carta y awo mi a bin comprende cu tin algun caso caba andando cu nos no tabata sa y cu ta mas grandi di loke nos a kere.” CUA a duna di conoce cu pronto lo tin mas contesta riba esaki y con esaki ta sigui. Di tur e topiconan trata, esun di douanewaarde ta esun cu mas a haya reaccion riba dje. 

Sinembargo di gobierno mes CUA no a haya reaccion. “Mi ta kere pronto nos lo bay puntra un reunion door di e informacion cu a haya acerca y di casonan cu tin andando tin cu bay warda. Mi ta asumi cu gobierno tin e druk of no tin atencion pa e preocupacionnan chikito di comercio. Mi ta kere internamente tambe lo ripara y por papia hunto,” asina e comerciante a finalisa bisando.